المغاربة ماغاديش يموتو بالجوع حيت غادي يتعاونوا بيناتهم حتى تدوز هاد الجايحة ولي عندو غير خبزة راه غادي يقسمها مع جارو ولكن في نفس الوقت الدولة خاص تدير مجهود مضاعف باش الناس لي كيستحقو المساعدة توصل ليهم

" تم رفض طلبكم لعدم استيفائكم لجميع شروط الإستحقاق" هذا هو الجواب لي توصل بيه الوالد على الطلب ديال الإستفادة لي كنت عمرت ليه، بائع متجول فايت ستين عام كيصرف على أسرة توقف النشاط لي كيمارس من نهار بدا الحجر الصحي، سلعتو لي كان خدام بيها مابقات ساوية ريال وتحبرات ومع ذلك بالنسبة للهادوك لي كيحددو شكون يستافد وشكون لا راه مكتوفرش فيه شروط الإستحقاق بلا حتى شي تفسير مقنع كيبين علاش، أو واش كاين شي خطأ في المعلومات، فقط رسالة آلية كتعلن عن إنقطاع رحمة الله، ملي قلت للواليدة هادشي قاتلي ايوا الحمد لله على كل حال، راه كاين ناس حدانا معندهم ماياكلو وماستافدوش، وعاودات ليا على واحد لمرة حداها كانت كتلقط غير البقولة من لخلا وتديها تبيعها فالسوق مع شوية دالبيض وتويشيات، ومابقاتش كتمشي، لدرجة أن الواليدة عطاتها فلوس الفطرة ديال رمضان بيها باش غادي يصرفو هاد السيمانة ومن وراها الله كريم.
وكاين حالات وحدين خريين حداهم لي كتخلي الواليد يبان لاباس عليه وماشي موشكيل كاع إلى متوصلش بالمساعدة على الأقل عندو ماياكل ومايشرب هاد الشهورة، كاين حداه ناس ماتوصلو بوالو وبصح راهم على الضص، كاين ناس كنعرفهم بشكل مباشر، رب أسرة كيخدم فالفلاحة حتى هو متوصلش بالمساعدة، كاين لي بالراميد ديالو ومتوصل بوالو، وره صبرو هاد الشهورة غير بالتكافل الإجتماعي لي بين المغاربة لي رغم كل شيئ مكيدوزوش بعضياتهم، وحتى دوك لي مقودة عليهم كيساعدو لي قود منهم حيت كاينين وبزاف، وللأسف هاد الناس راه متوصلو بمساعدات ديال الدولة والا جمعيات والا حتى حاجة.
نهار تأسس الصندوق ديال كورونا وكيفاش ساهمو فيه المغاربة والملك برزقهم بمختلف مستوياتهم الإجتماعية م، الأثرياء المغاربة راه ساهمو بنسبة كبيرة من ثروتهم خلات العالام حال فمو فيهم وفهاد الحس التضامني العالي وكيفاش سير المغرب هاد الأزمة ديال كورونا، ولكن حاليا وكيف قال وزير الداخلية كاين ناس لاباس عليهم شدو المساعدة وكاين ناس محتاجين وموصلهم والو، هادشي لي خاص يتلقى ليه حل حقيقي، المغاربة ماغاديش يموتو بالجوع حيت غادي يتعاونوا بيناتهم حتى تدوز هاد الجايحة ولي عندو غير خبزة راه غادي يقسمها مع جارو ولكن في نفس الوقت الدولة خاص تدير مجهود مضاعف باش الناس لي كيستحقو المساعدة توصل ليهم.