السؤال لي كيتردد حاليا هو واش غادي نخرجوا نهار عشرين حيت صافي الناس تقهرات.. ولادهم سلخوهم عصا.. الى كانو جامعين شي ريال راه كلاوه.. وبزاف منهم نهار كلسو صبحو الله كريم وبزاف متوصلوش بمساعدة الدولة وهوما كيستحقوها

لواليد عندو أمل كبير غادي ويتحول ليقين تام أن الدولة غادي تخلي الناس يخرجو نهار عشرين، وحتى ملي كيسولني كيكون كيتسنى التأكيد فقط، وملي كنشكك فهاد التاريخ وكنشرح ليه أنه كاع إلى حلات البلاد، راه ماغاديش يخرج كولشي وغادي يكون داكشي مقنن وغير جزئي وبالنسبة ليه هو كبائع متجول راه مايمكن يرجع يفرش حتى للصيف وشوف تشوف، وحتى كاع الى فرش شكون لي غادي يشري من عندو والطبقة الإجتماعية معامن كيخدم هي من أكبر المتضررين حيت مكاين لامدخرات يتكاو عليها لا والو، بنادم غير وقف من الخدمة صبح الله كريم، ووقعات هجرة نحو البادية، بنادم هز ولادو ورجع لدار واليديه أو عائلتو فالعروبية، حيت المعيشة رخيصة ويعديها بالصبر، اما المدينة معروف آش كاين فيها " كري تبات شري تنضغ".
لواليد وبزاف ديال الناس بحالو ديال القطاع الغير مهيكل تضررو بزاف بزاف من هاد الجايحة، قبل ماتدخل كورونا الواليد كان عندو راس لمال خدام بيه شاريه سلعة، حاليا من غير أنه توقف من الخدمة فراه حتى راس المال باش كان خدام نقصات قيمتو إلى ماعتبرناهاش تلاشات فخطرة، وماشي غير هو بزاف ديال الفراشة أو موالين لحوانت ديال لحوايج وسلعة خرى لي كانو سادين هاد ليا مراه داك السلعة مابقات ساوية ريال وتحبرات، وطبعا عمرت ليه فهاداك الموقع ديال كوفيد تضامن، وتوصل برسالة أنهم غادي يتحققو من الملف ديالون لي باقي متحققوش منو لحد الآن وباقي موصلو والو، في نفس الوقت وزير الداخلية الفتيت كيقول وسط البرلمان بلي بزاف ديال الميسورين ستافدو من مساعدات كورونا، وبزاف ديال المحتاجين ماوصلهم والو، اذن راه نفس الموشكيل ديال هادي عقود هو نيت لي باقي كيتعاود.
السؤال هو واش البلاد باقا قادرة على الحجر الصحي بجميع طبقاتها الإجتماعية، حيت هاد الضرر الإقتصادي راه لحق بكولشي من لفوق حتى لتحت، راه الى تزاد شهر آخر شحال من واحد غادي يفضل تلاتة دالخبزات فالنهار والعدس واللوبيا ديال الحبس على السيفيل خصوصا في الأحياء الشعبية لي واقفة عندهم القضية، حتى لي توصلوا بالمساعدات راه تقد يديباني بيها الواحد شهر او شهرين ولكن حتى لين، والموشكيل في نفس الوقت هو ان الخروج يقدر يسبب بموجة جديدة أشد فتكا ديال كورونا حسب الخبراء، ولكن راه بالنسبة لبزاف ديال الناس راه ماباقي ليهم والو ويخرجو هوما يقلبو على كورونا فين كاينة، حقا هذا وباء وصعيب وممعروفش وقاتل ولكن راه حتى الفقر والجوع قاتل، وهادشي واقع حتى فالبلدان العظمى، حاليا راه خاص تكون الاولوية لإنقاذ الإقتصاد ومساعدة الناس لي كيستحقو.