يخافو ما يحشمو.. من بعد ما حط ضدو شكاية.. خوانجي اعتذر لناشط حقوقي هددو بالقتل والتقطاع "طراف طراف" حيت دافع على بوشكيوة – فيديو

كيقولو أن الاعتذار والاعتراف بالخطأ فضيلة، لكن ماشي من بعد الخوف من المحاسبة والعقاب، واحد الخوانجي هذ الأيام ماخلاش لنبيل بهار، المدير التنفيذي للهيئة المغربية لحقوق الإنسان، بالسبان، ووصل بيه الحد لتهديدو بالقتل والتقطاع "طراف طراف" فميساج فوكال، هذشي فقط حيت دافع على مينة بوشكيوة، أستاذة الفلسفة اللي تشنات ضدها هجمة كبيرة بسبب حديثها على فحولة الرسول.
الخوانجي حط فيديو للعموم، اعتذر فيه ، من بعد ما حط ضدو هذ الأخير شكاية فالموضوع، اعتذر فيه وقال أن تخسار الهضرة اللي تلفظ بيه كان خطأ، وأنه كان فحالة غضب غيرة على رسول الإسلام، وهذشي خلا بهار يتنازل على شكايتو، ويطالب بتعوض ديال "درهم رمزي" للضرر.
بعد وضع الشكاية اليوم لدى وكيل الملك…توصلت الان بفيديو فيه اعتذار لي على السب والشتم والتهديد ، واعتذار لجميع اصدقائي لي سمعوا داك الخطاب الخطير لي توجه ليا .. المسامح كريم ، والانسانية قبل كل شيئ … اتمنى ان يفهم الجميع ، اننا في دولة الحق والقانون ، ماشي دولة الخلافة ، وان الاختلاف لا يجب ان يدفعنا الى التهديد والتقطاع …
Publiée par Nabil Bahhar sur Mercredi 27 mai 2020
وللإشارة، فحتى مينة بوشكيوة تلقات مجموعة من التهديدات بالتعنيف والقتل على حسابها فموقع التواصل الاجتماعي "فيسبوك" قبل ما تديزاكتيفيه، وهذا حال حتى الممثل رفيق بوبكر اللي تسربات فيديو ديالو كيتكلم فيه على الصلا والشراب، واللي اعتبروه البعض من خلالو كيستهزء بالدين.
وحتى النشطاء اللي دافعو على حق بوشكيوة وبوبكر فالتعبير على رأيهم بكل حرية تعرضو بدورهم للهجوم والانتقاد والتكفير من طرف مجموعة من الظلاميين، اللي كيعتبرو راسهم "حماة ديال الدين"، وكيهاجمو الناس بحجة "الانتصار للإسلام"، جاهلين بأن ازدراء الأديان والسخرية منها أو انتقادها فالدول المتقدمة كيتعتبر حق وماكيشكل حتى شي أدى للأشخاص.