لقجع باغي يكمل البطولة واخا شي وحدين كيدافعوا على عام بيض

فوزي لقجع، رئيس الجامعة الملكية المغربية لكرة القدم باغي يكمل البطولة في جميع أقسامها ووضع سيناريوهات كتهم جميع الاقسام، بما في ذلك بطولة الهواة والفئات الصغرى والكرة النسوية وكرة القدم داخل القاعة.
لقجع، منين شاف گاع البطولات في العالم عوالة ترجع، وفيها اللي ارجعات فعلا بحال البونسليكا والسبليون والإنگليز، اللي حتى هوما قرروا يستانفوا نشاطهم الكروي، عبر على رغبته في استئناف البطولة، وأكثر من ذلك وضع تصور واضح لكيفية استئناف الأنشطة الكروية، وراه موجود حاليا على الطابلة ديال عبد الواحد لفتيت، وزير الداخلية.
لقجع بدا كيستعد لاستئناف البطولة بعدما طلب من جميع الموظفين والأطر التقنية يلتحقوا بمقرات عملهم، كما بدأت الاستعدادات بمركز محمد السادس في المعمورة، اللي غادي يفتح أبوابه أمام المنتخبات الوطنية الصغرى في ليامات جاية.
واخا لقجع باغي يرجع الحياة للملاعب والبطولة، لكن شي وحدين معاه باغيين يكون عام بيض، باش يستافدوا من اللقب أو الصعود والنزول.
ويبدو أن الحسم النهائي في مصير البطولة غادي يكون مباشرة بعد رفع الحجر الصحي نهار الأربعاء الجاي.