خلقو الحدث ف2018. عمر فرج يستحق يكون رجل السنة. صياد المتهربين من الضرائب محيح. التي جي في ولقجع واخنوش وبوريطة والحموشي كلها وكيفاش صنع الحدث هاد العام

عمر فرج المدير العام لمديرية الضرائب شخصية صنعات الحدث فسنة 2018. دار امور كثيرة غادية دخلو للتاريخ. صياد اللي كيتهربو من الضرائب فالمغرب كيتعرض لحروب كبيرة من مافيات تخرب الاقتصاد وكتربح لملاير. دارو ليه كلشي باش يجريو عليه ويخوى ليهم الطريق.
غير قضية فرض ضرائب على لملايرية ديال الاطباء =القطاع الخاص= والمحامين تستحق تخليه رجل السنة. صدمة كبيرة باش اكتشفو لمغاربة ان الاطباء فالقطاع الخاص بما فيهم مالين لكلينيكات ما كيخلصو تا زفتة للدولة من الضرائب واللي كيخلص يالله 30 الف درهم للعام. في حين ان طبيب القطاع العام اللي كيقتاطعو ليه الضرائب من الجذر كيخلص 15 المرة الضرائب كثر من اطباء القطاع الخاص واخا الفرق فمدخولهم كبير بزاف بزاف. اطباء القطاع الخاص وخاصة اللي عندهم كلينيكات لقاو شي وحدين فحساباتهم البنكية الملايير وكل عام كيديكلاريو فاييت باش ما يخلصوش الضرائب. جريمة فاي دولة اوربية كانت دخلهم للحبس بعد ما تبيع كاع املاكهم.
فالمغرب وحقاش عارف هاد الواقع٬ مدير الضرائب فرج مشى معاهم دقة دقة. بغى يبدا معاهم صفحة جديدة. واخا هاكاك شي متخلفين رفضو حتى هاد العرض. هنا خاصو يطبق القانون وصافي.
صياد اللي كيتهربو من الضرائب خدم حتى بالاقمار الصناعية باش يطاردهم. طارد كذلك فئة اخرى مرفحة بزاف بزاف وهي فئة المحامين. دار ليهم ما دار للاطباء. قاومو ورافعو وكانت فمرافعتهم ضعيفة قدام الرأي العام. كاينين اللي كيترافعو بخمسين ستين مليون او اكثر وما باغيين يعطيو للدولة والو. باستثناء ليكابيني لكبار ديال المحاماة اللي كيخلصو الضرائب٬ حقاش كلياناتهم كيطلبو الفاكتورات٬ الباقي والو. شي وحدين حتى التسجيل فدار الضرائب ما دايرينوش. كيفاش باغيين يدافعو علي دولة الحق والقانون
هاد الشي علاش عمر فرج يستاحق يكون رجل سنة 2018. سنة صعيبة. الباطرونا كلات لعصا. فئة منها وقفات الاستثمارات نتيجة بزافت العوامل منها المقاطعة ودفع عدد منهم يخلصو حملة البام فاخر انتخابات تشريعية. فرج دار مراجعة ضريبية لعدد من الشركات لكبيرة فالمغرب بما فيها شركات الدولة بحال المكتب المديري الشريف للفوسفاط.
الدولة فظل سنة صعيبة نقصات ضرائبها. ومع ذلك تقاتل هاد الرجل باش يحارب على عدة واجهات. ها اللي ما كيرجعش الضريبة على القيمة المضافة للدولة ها اللي كيتهرب من الضرائب العادية….
هاد السنة كان ممكن يكون ربيع لخليع المدير العام للمكتب الوطني للسكك الحديدية رجل السنة. كلشي دارو باش يستحق هاد اللقب كون ما وقعاتش حادثة بولقنادل وتقلب التران وماتو مغاربة. هادي خربقات كلشي. لهاد الشي اللي يستاحق يكون حدث السنة هو “البراق” او التي جي في المغربي. حدث كبير ختم احداث المغرب هاد العام. كازا طنجة ولات فجوج سوايع. ما عمر لمغاربة كانو كيحلمو بيها. فين ما كنشد هاد التي جي في كنسب فهاداك البرلماني عمر بلافريج اللي قاد حملة ضدو. واش تران ما كيدوز لا على سوق لاربعا الغرب لا على لقصر لكبير لا على سيدي قاسم ما يستحقش يكون حدث كبير بزاف.
لخليع دار ثمن مزيان بزاف لهاد التران. اغلى بلاصة ب243 لطنجة وكاين ما رخص. لخليع قاد الترانات لخراين. بين مراكش وكازا ولى غير جوج سوايع حتى هو بعد ما دارت التثنية. جوج سكات. اكيد من يناير حتى نونبر لمغاربة تكرفصو. لكن باش تشوف اجوبة هاد المدير كتقول ضروري كان خاص التضحية اللي طلعات للركاب الدم.
اذن البوراق دار الحدث. حدث دخل لبلاد لمرحلة جديدة. لسرعة جديدة. لعهد جديد.
سرعة اخرى دارت فالرياضة. خاصة فكرة القدم. فوزي لقجع رئيس الجامعة الملكية لكرة القدم بشخصيتو بعنادو بقصوحية راسو باصرارو دخل الفرحة لقلوب لمغاربة. دخلها باش تأهلنا لمونديال روسيا وربحنا الكوت ديفوار فابيدجان. دخلها بعد ما دار المنتخب مونديال واعر واخا تقصى. خلا لملايين تفرح حتى مع الاقصاء. شافو قتيلة فالتيران. شافو التوني عرق. شافو امرابط تقاتل بطريقة خلاتو محبوب الجماهير.
المغرب رجع الهيبة للكورة. هاد الشي ماشي مجاني. لقجع دخل للجنة التنفيذية للكاف. المغرب ولى عندو صوت مهم. كانت الكان اللي ما عنظماتهاش الكاميرون تكون فالمغرب كون ترشح. امور اخرى خلاتها تهرب علينا.
لقجع كيتعرض لحروب كثيرة. شخصيتو خلاتو عرضة للهجوم. يستاحق هاد الاطار لكبير فالمالية =مدير الميزانية= يكون صانع الحدث فهاد العام. احسن بقى فالكاف على تعيينو وزيرا للمالية. كان من المرشحين لخلافة بوسعيد. بلاصتو اليوم مفيدة للبلاد. خدام ما مسوق لحد. ما ماديها فحد. عارف راسو منين جاي وولد من. الربح ولخسارة كاع ما داخلة كمعادلة فقاموسو.
كاين شخصية ماشي صنعات الحدث ولكن استمارت فصناعة الحدث. ممكن جدا تختار “رجل السنة” اللي هو عبد اللطيف الحموشي المدير العام للمديرية العامة للامن الوطني ومدير المخابرات الداخلية. رجل استثنائي قال عليه عبد الاله بنكيران مرة ل”كود” باش كنشوف اش دار الحموشي فالادارة من خدمة كيتزاد يقيني باللي الاصلاح فقطاعات بحال التعليم والصحة وغيرها ممكن. الاصلاح بشكل عام ممكن.
فالحقيقة من نهار وصل للمديرية العامة للامن الوطني وهو كيقود ثورة كبيرة. ثورة حقيقية. هاداك الجسد المريض الكبير اللي كان ممكن يطيح فاي وقت رجعات فيه الروح. دار التقنية فيه بتدرج. دار الحكامة بشكل ما يمكنش يتصورو شي حد. عقلن كلشي. دخل اللي فيديهم. سالا وقت السيبة والترفيحة والرشوة لكبيرة اللي كانت واكلة كلشي. الرشوة الصغيرة اللي حصل فيها يودي. يتحاكم ويغبر وجهو على الادارة.
واخا هاد المهمة لكبيرة واللي كيوجد فيها مديرية كبيرة كتبنى خارج الرباط واخا الخدمة لكبيرة فيها بقى محافظ علي النيفو ديال محاربة التطرف. دواعش كثيرة كترصد بنا. ربحها وطيحها. خدام مع فرقتو ليل ونهار. جريمة شمهروش الارهابية كانت استثناء هادي سنوات. المسؤولية فيها ماشي للامن بل للجدارمية. حتى هما عندهم اجهزة واعرة. الجريمة وقعات فترابهم. محسوبة عليهم.
الحموشي خدا هاد اللقب =رجل السنة= فالسنوات الاخيرة. قوتو انو واخا خداه مازال محافظ على نفس الوثيرة. نفس النيفو.
رجل اخر دار كلشي باش يطيح وما طاحش. بهاد الشي صنع الحدث فهاد العام. يتعلق الامر بعزيز اخنوش وزير الفلاحة والصيد البحري رئيس “الاحرار”. فشهر ابريل خرجات المقاطعة. كانت من اهدافها تقتلو سياسيا عبر ضرب شركته “افريقيا= اللي معاه فيها مساهمين اخرين. المخطط وجد قبل. شفنا الياس العماري الرئيس السابق للبام كيهدر علي مول “بومبات ليصانص” اللي “كيدير السياسة”. علاش ما جبدناش البي جي دي حقاش الضربة ديال المقاطعة ما داروهاش. اكيد باش شعلات ناسهم دارو رابوزهم ونفخو ولكن ماشي هما اللي داروها. الجهة اللي دارت المقاطعة كان من اهدافها ان اخنوش يبعد من السياسة. طبعا هاد الجهة ماشي خارج الدولة بل جزء من الدولة. عقلتو على تصريح رئيس الحكومة السابق عبد الاله بنكيران بخصوص هاد المقاطعة. رجل دولة عارف اللعب مزيان.
هاد الفئة اللي بغات اخنوش يخرج من السياسة دفعاتو يدير اخطاء فتدبير ديك المرحلة. كثار بنادم حتى لقراب منو نصحوه يدير خرجة يدافع بيها على راسو. شي قال باللي داروها ليه باش يشوفو ردة فعلو. كلهم قالو اه ما خرجش اذن ما فيدوش. الهدف كان يخرج باش يقتلوه نهائيا. فهم اللعبة وسكت حقاش الخصم ماشي هو اللي كيبان فالساحة.
ماشي غير سكت بل رجع. تدريجيا بلا صداع ولكن رجع. للحزب للي كيرأسو. كانت اشادة كبيرة للملك ب”المغرب الاخضر” اللي كيشرف عليه. الدولة كلها معولة علي هاد القطاع باش يخدم عباد الله يمص البطالة يخلق الثروة.
“افريقيا” ما ضرتاتش كيف باقي الشركات من المقاطعة. اليوم هي اللي كيمشيو ليها الناس بزاف حقاش عندها اقل اثمنة فالمحروقات. حزبو خدام بشوية عليه واخا خاصو يبدل بزافت لكمامر بحال هاداك العطواني اللي باغي يترشح فالمحمدية لرئاسة المجلس البلدي. خدام كيجدد بشوية عليه. هاد السيد صنع الحدث. تحدى اعصار بغى يدمرو. خرج منو سالم.
واحد اخر من نفس الحزب ديال الاحرار دار عملية ما عمرها وقعات فتاريخ البيزنس فالمغرب. يتعلق الامر بوزير الصناعة والتجارة والاستثمار مولاي حفيظ العلمي. باع شركتو “ساهام” =غير التأمين بوحدو= بمليار دولار لشركة “سانلام” الجنوب افريقية. ما عمر شي شركة خاصة دارت اللي دار. ماشي غير فالبيزنس ديالو حتى فدارتو للوزارة رجع المغرب محيح فصناعة السيارات وقرب يوصل ل80 بالمائة من كاع الصناعات اللي كتدخل فصناعة السيارات٬ اللي كيوفر عليها المغرب. هاد العام صنع الحدث حقاش “بوجو” التحقات ب”رونو”. الاولى فالقنيطرة والثانية فطنجة. المغرب ولى مصدر للسيارات. اييه. حتى فقطاع الطيران خدام مزيان بزاف فالبلاد.
اللي ما مفهومش علاش تضرب اخيرا. بيان الديوان الملكي كيقول باللي الملك هدر عليه على تأخر المنطقة الصناعية بسوس. تقليقة كاينة ولكن التسريب هدر على امور كثيرة. الاكيد ان هاد الشي ما عندو علاقة بالمنطقة الصناعية بسوس حقاش المنطقة خدامة وثلاثة مصانع فتحات كاع والتدشين تنقل فالتلفزيون وكلشي عارف.
اذن هاداك التسريب غير الدستوري هدفو اشياء اخرى. وهاد الشي ماشي مهم. اللي كاين هو فهاد العام وزارتو خلقات بزافت الخدمة حركات البلاد. بيعيتو دخلات العملة الصعبة. فظرفية خايبة تراجعات فيه الاستثمارات ب23 بالمائة راه مليار دولار رجعات الروح فاقتصاد مهلهل.
كاين شخصية اخرى حيحات هاد العام واخا قوداتها فشي امور وهي وزير الخارجية والتعاون ناصر بوريطة. هاد الوزير جرى فاجتماع الجمعية العامة للامم المتحدة الاخير اكثر من 52 كلمتر. من اجتماع لاجتماع من لقاء للقاء. اكيد ان التعاون لكبير مع ياسين المنصوري مدير المخابرات الخارجية ساعدو بزاف ولكن مع فرقتو الصغيرة جدا حيح. المغرب دار لقاءات مع عدد كبير. ما عمرو دار بحال هاد العدد فحياتو. مع دول صحابنا مع دول ضدنا مع دول ممكن تكون صحابنا غدا. قاد المفاوضات الاولى من نوعها مند مانهاست مع البوليساريو. كان فالوفد 3 من الصحرا.
بوريطة ايلى قدر ينسى التعامل مع الصحافة الاجنبية وما يعطيهاش هو او غيرو اسماء الوفد المغربي اللي شارك فجنيف وكون استمر فتواصلو كيف كان مع كاع الصحف ماشي يختار اللي بغى وكون زاد تاق فراسو ونقى شي ملخين دايرين بيه بحال هاداك محمد الفاسي اللي كاين فالتواصل واللي كيقول باللي كيحكم حتى هو٬ ممكن يمشي بعيد. خاصو يتحزم بحال فؤاد يازوغ وشفيقة الهبطي واللي فنفس حجمهم غادي يتقوى اكثر. اللي داخل بالدفيع بالطليب يبعدو من جنابو وجناب جنابو.
السيد خلق الحدث ورجع للخارجية بريقها اللي طار مع بنعرفة باش كان فيها واستمر مع الفعفاع.