واش سفير المغرب فباريس عندو باسبور فرنسي؟ بنموسى ل"كود": ما عندي حتى شي جنسية من غير جنسية بلادي

تصريح الكاتب والناطق الرسمي السابق باسم القصر حسن اوريد بخصوص شكيب بنموسى رئيس اللجنة المكلفة بالمشروع التنموي الجديد منوضها. اوريد قال خلال مشاركته في ندوة حول "أزمة الديمقراطية بالمغرب" نظمتها شبيبة العدالة والتنمية باقليم الحي الحسني،"لا أعرف لماذا قامت السفيرة بتسريب ذلك، هل اعتبرته فرنسيا؟"
صحاب نظرية المؤامرة لقاوها فرصة باش يبداو تحاليلهم التآمرية بخصوص تدوينة السفيرة الفرنسية الجمعة اللي فاتت بعد لقاءها بنموسى وقالت باللي قدم ليها "تقرير مرحلي" على عمل اللجنة. وهو كان غير سمع ليها وصافي كما اكد.
"كود" سولات بنموسى نيشان "واش عندك جنسية فرنسية؟" السفير المغربي بباريس ورئيس اللجنة المكلفة بالمشروع التنموي الجديد رد على سؤال "كود" "ما عنديش باسبور فرنسي" و"ما عنديش الجنسبة"
الناس اللي زادت روجات هاد الشي ديال اوريد بناوه على دراستو ففرانسا. بنموسى قال ل"كود" "ما عمرني طلبتها". السفير المغربي اللي قرا ففرنسا وبعدها مشى ماساشوسْت الامريكية باش يكمل دراساتو فالرياضيات٬ قال ل"كود" انو "مللي دخلت خدمت فالادارة ديال بلادي".