مات على طريقة جورج فلويد.. فيديو كيوثق وفاة شاب مغاربي فمركز للقاصرين فاسبانيا.. ربطوه 6 بطريقة عنيفة وبرك ليه واحد على راسو

سربات جريدة "الباييس" الفيديو دوفاة إلياس الطاهري، قاصر مغاربي، ف1 يونيو من العام اللي فات. الفيديو كيصور كيفاش 5 ديال ليسيكيريتي فمركز القاصرين اللي كان عايش فيه، بالإضافة للمسؤول على السونتر، حاولو يربطوه من رجليه ويديه ويلويو ليه ذراعو بطريقة عنيفة فواحد البيت صغير.
وحسب الفيديو، اللي مدة العرض ديالو تجاوزات 13 دقيقة، تقييد الطاهري كان ف4 دقائق منو فقط، من بعد جا واحد من ليسيكيريتي، وحط ركابيه على ظهرو وراسو لمدة طويلة، ومن بعد منين ناض، كان الدري ماكيتحركش، كان ديجا مات.
القاصر، اللي ربطوه اليسيكيريتي فشومبر معزولة فمركز القاصرين فوضعية صعبة، اللي كاين فبلدية أورايا فمقاطعة المرية فاسبانيا، مادار حتى شي رد فعل أو صدرات عليه شي مقاومة، بينما بقاو هوما كيحاولو يعنفوه وهوما كيربطو فيه.
الطريقة اللي مات بيها القاصر مغاربي شبيهة لحد كبير بالشكل باش موت المواطن الأمريكي جورج فلويد على يد البوليس، اللي حط ركبتو على عنقو حتى ماخلاهش يتنفس، وهو الحادث اللي شعل شرارة الاحتجاجات فميريكان.
حتى الطاهري، من خلال نتائج التشريح، تبين أنه تصاب باضطراب تنفسي حاد، وتسارع فدقات القلب، هي اللي عجلات بالوفاة ديالو، لكن القاضية تيريزا إينيس سانشيز غيسبرت كانت غلقلت الملف ديالو فيناير اللي فات، واعتبرات موتو "مجرد موت عرضي"، وهذ القرار طعنات فيه عائلة القاصر.
والفيديو، اللي مصور بكاميرا مراقبة، ماتنشرش كامل، وماكانش تسرب قبل حيت كيتعتبر ملخص سري خاص بالعرض أمام المحكمة فقط.
رابط الفيديو مرفق بمقال "الباييس" :