الكاتب المغربي عبد الله الطايع: بزاف انتحرو وتشردو بسباب حملة التشهير اللي قادتها صوفيا طالوني ضد المثليين.. وكنطلب من المغاربة يساعدوهم فهاد الفترة ويوقفو معاهم

كشف الكاتب المغربي المثلي، عبد الله الطايع، بللي مجموعة من المثليين انتحرو، وكاين فيهم اللي خرج للزنقة وتشرد، بعدما حرضات المتحولة الجنسية صوفيا طالوني المتابعين ديالها، ففيديو على حسابها ف"أنستكَرام"، باش يدخلو لتطبيقات المثليين الجنسيين، وحصلو فيها أفراد من عائلاتهم وجيرانهم.
وأكد الكاتب المغربي المقيم ففرانسا، فتدوينة ليه فالصفحة ديالو الرسمية ف"فيسبوك"، بللي هذشي اللي دارت صوفيا فهذ الظرفية اللي كتعرف البلاد حالة ديال الطوارئ الصحية بسباب فيروس كورونا المستجد مؤلم بزاف وتراجيدي وإجرامي ومقزز، وكيهدد أفراد مجتمع "الميم" (المثليين ومزدوجي الميول والمتحولين)، اللي ما عندهم حتى شي ذنب فهذشي اللي جاري ليهم.
الطايع كيتساءل فهذ الإطار: "علاش القانون كيميز بين أفراد مجتمع الميم والمغايرين؟ علاش هذ القانون كيحول مجموعة من المغاربة لمجرمين فالوقت اللي هوما كيحاولو فقط يعيشو بسلام؟ علاش الجمعيات هذي 20 عام وهي كتناضل باش تنصف هذ الناس والدولة مامسوقاش ودايرة عين ميكة؟"
ووجه الطايع، من خلال التدوينة، ميساج لأفراد مجتمع "الميم"، باش يعبر ليهم على الحب ديالو ليهم وتضامنو معاهم، وكلب منهم يخبيو راسهم وييحميو راسهم بأي طريقة ومايخليوش الناس اللي كيتربصو بيهم يشدوهم.
هذشي ووجه الطايع ميساج للآباء والأمهات والخوت والخواتات، وطلب منهم يحنو على المثليين ومزدوجي الميول والمتحولين، ويعاونوهم فهذ المحنة ويشدو بيديهم، ومايخليوش الجهل يسيطر عليهم فهذ الجو المشحون، ويوقفو فجنبهم ويساعدهم.