المغاربة اللي جاو من الصبليون فوضعية مكرفصة بزاف.. جابوهم لمركز التخييم وبقاو برا حتى طاح الظلام.. وليشومبر موسخين والتنظيم مكاينش -فيديوهات

المغاربة اللي رجعو من جنوب اسبانية كاعيين مزيان، بعدما حطوهوم فمركز ديال الاصطياف فالشريط الساحلي "تامودة باي" فيه مرافق مكرفصة بزاف، وحطو فكل أبارتومون ربعة ديال الناس، وحطو جوج فكل شومبر.
وكانو بعض ليسويت موسخين ومغبرين لدرجة كبيرة، بحكم أنهم كانو مسدودين لمدة طويلة، وعاد طلبو من المغاربة باش يتكلفو بالميناج لراسهم.
وحسب مصادر "كود"، فالمغاربة اللي حطاتهم لبارح الطيارة مع الربعة فمطار "سانية الرمل" بقاو لساعات متأخرة ديال الليل فالجردة ديال مركز التخييم، بسبب سوء التنظيم اللي كان، بحيث حتى وصلو عاد بداو يفكرو فين يحطوهوم، وتسبب هذشي فتكون تجمعات بشرية.
وهذي كتعتبر أول رحلة لجلب مغاربة اسبانيا من برا، مزال كاينة رحلة أخرى غيجيو فيها العالقين فمدريد غدا الجمعة 12 يونيو، ورحلة خرى من برشلونة فالاثنين 15 يونيو، باش يبلغ مجموع المغاربة اللي غيرجعو من سبانيا فالطوطال 900 واحد.
وكاين حديث على وجود رحلة بحرية بالنسبة للناس اللي عندهم الطوموبيلات، واللي ماعندهم فين يخليوهم، وهذشي باش يجيبو معاهم طوموبيلاتهم فالباطو.