أزمة المغاربة الحاصلين فالخارج: بوريطة فورطة..وشبهة تلاعبات ف لوائح العائدين نوضات قربلة والعصيان والبرلمان غادي يسولو الوزير

العصيان والتمرد والفضح فوجه مصالح الخارجية ببعض دول العالم، داروه المغاربة العالقين بالخارج لي حسو ب"الحكرة" وتذمرو من سياسة وزارة الخارجية في تدبير ملفهم.
فيديوهات وتسجيلات كتقول كاين تلاعبات ف لوائح العائدين، موظفين وأطر باقين حاصلين، في حين شي وحدين لي رجعو فيهم لي عندهم الإقامة وماشي حاصلين تما، هادشي غضب المتضررين من هاد السياسة ديال "باك صاحبي" وتسبب ف غضب وانهيار نفسية عددهم.
اه البرنامج اللي تعطا ديال الرحلات فيها من الاثنين 22 يونيو الى الخميس 25 يونيو، غادين يكونو 21 رحلة فيها 3030 مغربي، كلهم غاديين ينزلو فمطار اكادير المسيرة حسب هاد البرنامج.
روين نايضا، فيديوهات وتسجيلات كاتهم الخارجية. ها لي هضر على "الرشوة" وها اللي هضر على "التلاعبات". وزارة بوريطة ساكتة لا بلاغ ولا توضيح .. والفضيحة بغات تصحح غلطتها ب"الاتصال بالصحفيين" وطلبهم يدوزو روايات معندها علاقة بالواقع غير صباغة وصافي.
اليوم الاثنين كاينين 2 رحلات من باريس كل وحدة فيها 150 مسافر وكاينة رحلة من مونبوليي واخرى من امستردام ووحدة اخرى من تونس كل وحدة فيها بحال ديال باريس 150 مسافر اما الاخيرة اللي غادية تكون من دبي فيها 240 بلاصة. هاد الرحلات ما فيهاش بريطانيا والمانيا اللي حاصلين فيها شي مغاربة. كيفاش مدخلين دول غير اوربية ومخليين هادو.
نهار الثلاث 23 يونيو كاينة عاود تاني جوج رحلات من باريس فيهم بجوج 300 مسافر ووحدة من ليون واخرى من دكار والاخيرة من بروكسيل وكل وحدة فيها 150 مسافر.
نهار لاربعا 24 يوينيو عاود ثاني جوج رحلات من باريس فيهم بجوج 300 مسافر ووحدة من ليون فيها 150 مسافر والاخيرة من دبي فيها 240 مسافر.
هاد الرحلات غادية تسالي حسب عاد البرنامج ديال الناس اللي غاديين يمشيو لاكادير نهار الخميس 25 ب5 رحلات. جوج من باريس كل وحدة فيها 150 مسافر ورحلة من ليون فيها 150 مسافر ووحدة من روما فيها نفس العدد واخيرة من بروكسيل فيها 150 رحلة.
دبا الوزير اليوم مطلوب يجاوب البرلمانيين، اكيد تعقيبات كتسناه والفضايح لي بانو ف الفيديوهات وتسمعو ف التسجيلات غادي يطرحو.