ها كيفاش توزعات 93 إصابة بكورونا على الجهات.. فاس مكناس سجلات 35 إصابة وهي أكبر حصيلة.. وها التفاصيل

هذ الصباح سجلات جهة فاس مكناس أعلى حصيلة جديدة دالإصابات بفيروس كورونا المستجد مع باقي الجهات، بحيث سجلات 35 حالة، ووصلات فالمجموع ل2018 إصابة.
وحسب النسبة المئوية اللي عطات وزارة الصحة فموقع الرصد الوبائي للفيروس، فكتجي بعد فاس مكناس جهة كازا سطات اللي سجلات 19 إصابة ووصلات ل4058 حالة، ثم بعدها مراكش آسفي ب17 إصابة وبلعات الطوطال ديال 2936، ثم جهة طنجة تطوان الحسيمة اللي وصلات ل3326 إصابة بعدما سجلات 9 حالات جديدة.
بالنسبة للجهات الأخرى سجلات الداخلة واد الذهب 4 حالات إضافية ووصلات ل32 فالمجموع، وسجلات كل من جهة الرباط سلا القنيطرة وجهة كَلميم واد نون 2 حالات، وبلغ المجموع فيهم على التوالي 2098 و150 حالة.
وكتبقى النتيجة اللي كتعطي النسبة المئوية مادقيقاش، و"كود" غاتوافيكم، كيف جرات العادة، بتفاصيل الوضعية الوبائية فالجهات والأقاليم فالعشية، كيفما غتعلن عليها المديريات الجهوية للصحة.