سكوب. بغينا كلشي بحال بحال. تسونامي "الايادي البيضا" خاصو يضرب حتى العمال. كيفاش فعين الدياب ممنوع الشراب بلا ماكلة وفلمعاريف 4 عمال مقاطعات مقصرين وشافهم البوليس

تسوماني "الايادي البيضاء" للي بدا يضرب مطاعم لملايرية فعين الدياب بسباب مخالفتهم للقانون واش غادي يشمل كاع كازا ولا غير لاكورنيش.
"كود" توصلات بمعطيات باللي نهار الخميس 27 غشت 2020 بريسطو "لوسامفلاي" بزنقة علي بن عبد الرازق فالمعاريف فكازا جاها 4 ديال عمال مقاطعات فولاية كازا. من حقهم. غير هما حسب احد مستخدمي المطعم ل"كود" كانو باركين فطابلة كيشربو. وفق مصدر "كود" فالبوليس فاطار جولاتو فكاع المطاعم من نهار 20 غشت٬ دخل وكانو بوحدهم ما كياكلوش. يعني المطعم دار خدمة بار. وباش عرفوهم عمال مشاو فحالهم.
وفق مصدر "كود" اللي كيعرفهم بالاسماء فهادو عمال عمالة 3 المقاطعات فكازا ولاخر مكلف بوكالة معروفة بالرخص الاستثنائية. هاد الوكالة عليها شبهات فساد مع كبار المنعشين العقاريين. منهم شي وحدين قلبوها مطاعم ما كتسوقش بزاف للقانون.
دابا تسونامي الايادي البيضا واش غير على عين الدياب ولى على كاع مطاعم كازا. ثم هادو اللي حصلو مخالفين القانون واش غاديين يطبقو عليهم القانون ويدخل وزير الداخلية يدير خدمتو لا غير على الزبناء العاديين.
من حقهم يديرو اللي بغاو ولكن غير القانون يمشي على كلشي. راه باش قال مستخدم المطعم ل"كود" اش من عمالات هادو اكتشفنا انهم فبلايص كيتسجل فيها اكبر عدد من حالات كورونا فيروس كل نهار فكازا.
كلشي خاصو يكون سواسية فتطبيق القانون او فتعليق القانون. ففتح المطاعم او فتح البارات.