سكوب. باش نفهمو اش وقع البارح. مطاعم لملايرية اللي كيخلعو كلشي. الحموشي طلق "الايادي البيضاء" فكازا. سالى وقت السيبة وصاحبي مسؤول كبير وكولشي ليرسطو اللي ما كيحتارموش القانون غادي يتفرض عليهم احترامو

علمت "كود" ان ما وقع البارح فمطعم "لوكابيستون" فالعنق فكازا كيدخل فعملية كبيرة ديال "الايادي البيضاء" اطلقها شخصيا المدير العام للمديرية العامة للامن الوطني عبد اللطيف الحموشي. وفق مصدر "كود" المأذون فان العملية غادية تستمر وباللي كاين امر من المدير العام واشراف شخصي على تطبيق هاد الامر من قبل والي امن الدار البيضاء.
الهدف وفق مصدر "كود" هو "فرض تطبيق القانون"٬ حقاش "مطاعم عين الدياب تحولات لبارات بدون احترام التباعد الاجتماعي وبدون رخصة بدون بدون بدون. البارات فزمن هاد الجايحة ومع حالة الطوارئ بقات مسدودة. اي ان هاد المطاعم استغلو لوجيبة باش يديرو خدمة ما عندهمش رخصة ديالها.
مطعم "لوكابيستون" عندو بار ديالو حتى هو داخل المطعم. هاد الشي علاش جاتو البارح اللجنة تقول مصادر "كود".
عدد من المطاعم الراقية يشرح مصدر "كود"٬ كانو ديما مسنودين من بعض ذوي النفوذ وكانو كعتبارو ريوسهم فوق القانون. مصدر "كود" اكد باللي دابا "ما غاديش يكون شي حد فوق القانون". ما غادينش يبقاو خدامين حتى بعد ما يسالي الوقت اللي عندهم فالرخصة مثلا.
للقيام بهاد المهمة اكد مصدر "كود" ان الحموشي ومنذ 10 ايام امر بتعبئة كل الموارد الضرورية لفرض تطبيق القانون
دابا الحملة يالله فبدايتها. غاديين نشوفو مطاعم كثيرة كانت دايرة ما بغات تخلص لحساب٬ خاصة مطاعم كورنيش عين الدياب.