اش واقع فكازا. دخلو لواحد من اشهر مطاعم كازا. زبون: دخلو البوليس وعطاوني ذعيرة 600 درهم حقاش ما دايرش الكمامة وهددونا يديونا للكوميسارية

اش واقع فكازا. كاين صرامة كبيرة وبزاف فقضية لكمايم. دابا نازلين علي كاع لقهاوي المعروفة فكازا على قبال واش دايرين لكمايم ولا اللا ماشي غير اللي خدامين حتى لكليان.
فهاد الليل نزلو على ليريسطو. منها واحدة من اشهر مطاعم كازا "لوكابيستون" اللي كاين فالعنق. مواطن اسمو م. ب دار قصتو فصفحتو. قال باللي كان كياكل مع مراتو فهاد المطعم. دخلو البوليس وخداو لينا لاكارط ناسيونال باش نخلصو 600 درهم على قبال لكمامة". قالو لينا ما درناهاش =هو ومراتو كل واحد 300.
الزبون قال باللي سولهم كيفاش يقدرو ياكلو بالكمامة ما جاوبوهمش. واوضح ان البوليس كان اگريسيف وهددهم يمشيو الكوميسارية ايلى احتجو.
هو المعمول به فاسبانيا مثلا٬ هو ان اي مطعم فالهواء الطلق مفروض على لكليان يدير لكمامة. باش يشرب او ياكل يحيدها. يسالي يرجعها. فالبلايص المسدودة باش يدخل ويگلس يحيدها. ايلى تحرك فاي بلاصة يديرها.
ثم حاجة اخرى هنا ما كاين حتى شي حد كيهدر مع البوليس. اللي ما عجبو الحال كاين القضاء. اللي هدر مع البوليس بقلة ادب ينزلوه مباشرة.
شهادة هاد الشاب كيقول باللي تظلم. وحس بالغبينة
دابا مطاعم كازا غادية تسد وصافي. خاص الصرامة فتطبيق القانون ولكن خاص يخليو الناس اللي كتحتارم هاد القانون تخدم.