بوريطة بغى يركب على افتتاح قنصلية الامارات غدا وبقى ليه غير الطبالة ما جابهمش ولكن تصدم بهاد الخبار

ناصر بوريطة وزير الخارجية والتعاون اللي عزيز عليه راسو وعزيز عليه يبان ويتصور كيفتاتح قنصليات دول فمدن الصحراء العيون والداخلة تقولب. غدا غادية تفتاتح الامارات العربية المتحدة قنصلية ليها فالعيون. بوريطة كان كيتسنى وزير خارجية الامارات يجي. الساعة تصدم. هاد المسؤول ما غاديش يجي للافتتاح.
ضربة لهاد الوزير اللي كيطير من المقلة. حقاش جايب الصحافيين من الرباط وجايب صحابو اللي كيتهلاو فيه. ما مسوق لا لكورونا ولا والو. باغي يبين للفوق باللي وزير كيخدم. دابا اللي غادي يحضر هو سفير الامارات فالرباط اللي وصل اليوم للعيون. وزير الخارجية الاماراتي ما فيه ما يتحرك وغادي يرسل شي لعيبة وصافي.
اذن الافتتاح ديال غدا ما بقاش عندو نفس المعنى. بحضور وزير الخارجية ماشي بحال حضور السفير.
بوريطة اللي كيحتاقر الصحافة المحلية جايب صحافيين كثار من الرباط. ما عمرو هدر مع هاد الصحافة ولا جاوب على شي سؤال. غدا موحالش يكون استثناء. التواصل عندو معروف. غير شوفو اش جاب للمديرية يبان كلشي. مشى بدل على فالشروط باش يحط اللي بغى. خدمها قبل ما تاخد المنصب فعملية احتال بيها على رئيس الحكومة وتحدى فيها رئيس الدولة. الملك قال خاص اعادة الاعتبار فالمناصب السامية وهو جاب اللي كان اختارها قبل ما يتحطو كاع الدواصا للكونكور.