لمن تسخر وهبي اليوم فلجنة المالية. برلماني ل"كود" ما عمرنا شفناه جا باش يهاجم مزوار ويهدر على "الرعونة الاقتصادية" فاشارة واضحة للبيان المعلوم وراه باين مسخر

اليوم فمناقشة قانون المالية 2021 قبل اقراره فقراءة ثانية تجبدات قضية رفع رسوم جمركية على البوليستر من 2.5 الي 17 بالمائة. هادي كان دارها مجلس المستشارين. مجلس النواب رفضها. كان تدخل فاللول على رفض هاد النقطة. غير المثير هو تدخل الامين العام لحزب الاصالة والمعاصرة عبد اللطيف وهبي. برلماني من الاغلبية قال ل"كود" انو تفاجأ لحضور وهبي "راه ما مولفش يحضر. خدا الكلمة وقال باللي غادي يشرح ويملح ويقول كلشي بالاسماء. كانت رفشات ليه قبل منو مداخلات برلمانية" يشرح مصدر "كود".
الاعتراضات كانت على ان هاد النقطة اللي دارتها الباطرونا غادية تستافد منها شركة من مؤسسيها صلاح الدين مزوار الوزير السابق ورئيس التجمع الوطني للاحرار سابقا
المصدر اكد ل"كود" باللي وهبي كاين كان مسخر. وقدم ما سماه دليلا علي كلامو "توظيف عبارة الرعونة" وقال علي مزوار٬ انو بعد ما كان كيدير "الرعونة السياسية بغى يدير الرعونة الاقتصادية". طبعا هاد العبارة كان وظفها بحقارة وزير الخارجية والتعاون باش بغى يصفي حساباتو مع مزوار على خلفية تصريحو على الجزائر فلقاء حضرو كرئيس للباطرونا فمراكش. ديك الساعة بوريطة خرج بيان دار فيه سمو وحقارتو وقال ان "حكومة صاحب الجلالة تشجب هذا التصرف غير المسؤول والأرعن والمتهور".
اذن وهبي وفق مصدر "كود"٬ اللي جا قال هاد الهدرة وجبد قضية بوسعيد =باش كان وزير المالية= وحفيظ العلمي =على حساب بيع شركتو "ساهام"٬ ومن بعد خرج من اجتماع اللجنة.
دابا غير لمن كان مسخر راه هو السؤال المهم.