لارام مريضة. من نهار جابو عدو عبد الحميد للادارة العامة وهي اللاور اللاور. حتى باش بغاو يديرو عرض للمشجعين لمغاربة للمونديال فالماتشات الاولى للمجموعات: 15 يونيو بسان بيترسبورگ و20 يونيو بموسكو و21 يونيو بكالينغراد طلع بحالو متخلف. لارام دارت 5 الاف درهم ذهاب واياب لكل ماتش ولكن بشرط وهادي هو الخايب. يمشي ويجي فنهار والو ما يبات ما والو. الطيارة اللي داتو تجيبو. اش هاد العرض المتخلف. واش الجمهور غادي يتفرج غير فالماتش. اللي فكر فهاد العرض من “لارام” متخلف بزاف بزاف بزاف بزاف. هادي مناسبة للجمهور يشوف روسيا. يشوف مدنها الجميلة. يدور شوية يعيش المونديال. لكن مع عرض “لارام” ممنوع عليك. هاد العرض وفق مصدر ل”كود” ما عجب حد. ماشي غير الزبناء حتى اللي فالوكالات ديال لارام ما فهموش هاد الغباء ديال العرض “خاص يكون عرض مشجع. للي عندو جوج تذاكر وبغى يتفرج فيهم بجوج. يكون الذهاب فالماتش الاول والاياب باش يسالي الماتش الثاني ماشي خاصك تمشي وتجي باش تستافد من العرض” يشرح مصدر “كود”. المصدر قال ان هاد العرض عليه اقبال اكثر من ضعيف منذ اطلاقه البارح “كانو يتسناو يطير. الساعة ما داها فيه حد. خاصو تعديل وفاقرب وقت”
