القدس خاص تكون عاصمة الجميع. الدبيش أستاذ الحضارة فجامعة بنمسيك ل"كود": قضية الصحرا المغربية أسبق من فلسطين.. والمكون العبري جزء من الهوية المغربية

قال عبد الوهاب الدبيش، أستاذ الحضارة والتاريخ سابقا فكلية الآداب ببنمسيك فكازا، أن الدفاع عن مغربية الصحرا أهم من فلسطين أو أي قضية أو دولة أخرى، حيت القضية الوطنية أسبق من كلشي.
وزاد الدبيش، فتصريحو ل"كود"، أن القضية الوطنية ماخاصش يتم الربط ديالها بالقضية الفلسطينية، "وماعرفتش علاش التركيز على المغرب وربط هذشي بالصحراء فالوقت اللي مجموعة من الدول العربية مطبعة من إسرائيل من شحال هذي وماحاسبها حد، وإسرائيل تدر مليارات الدولارات فخزينة فلسطين سنويا، وحتى تركيا عندها سفارة فتل أبيب وعندها معاها علاقات استراتيجية لكن فالمقابل كَالسة كتعطي النصائح"، على حد تعبيرو.
وأكد أن إعادة فتح مكتب الاتصال الإسرائيلي ماكيعنيش التخلي على القضية الفلسطينية، والمغرب متمسك هو وشريحة كبيرة من الشعب ديالو بحل الدولتين واعتراف بحق فلسطين فالوجود كدولة.
وكيشوف ان المكون العبري جزء من الهوية المغربية، بحكم أن الدستور المغربي ركز على المكونين الأمازيغي والعبري، واليهود المغاربة فإسرائيل كثار ومازال مرتبطين عاطفيا وثقافيا بوطنهم الأصلي، و"بالنسبة لي القدس ماخاصها تكون العاصمة ديال حد، خاصة تكون عاصمة العالم حيت فيها مجموعين جميع الديانات منها المسيحية والزراديشتية"، حسب هضرتو.