رئيس المجلس الوطني للصحافة فتصريح ل"كود": سيفطنا مراسلة للعثماني باش ننبهوهم للأزمة للي كيعيشها قطاع الصحافة.. وإلا ما نقذناش المؤسسات الإعلامية بكري تقدر تغرق فالإفلاس

سافط يونس مجاهد، رئيس المجلس الوطني للصحافة، رسالة لرئيس الحكومة، سعد الدين العثماني، باش يخبرو بالوضعية اللي كيعيشها قطاع الصحافة والإعلام فهذ الفترة ديال حالة الطوارئ الصحية اللي فرضها ظهور فيروس كورونا المستجد فالمغرب، وأكد ليه فيها بللي هذ القطاع خاص اللي ينقذو من هذ الأزمة قبل ما يفوت الفوت.
وكشف مجاهد، فتصريحو ل"كود" بللي تكلم فالرسالة اللي وجهها للعثماني على الأزمة "الخانقة" اللي كيعيشها القطاع، واللي ممكن تأدي بمجموعة دالمؤسسات للإفلاس التام، "بحكم أن الجرائد دابا توقفات على النشر ومابقاتش كتحقق ارباح من المبيعات، بالإضافة إلى أن الصحافة الورقية والإلكترونية معا ولاو كيعانيو من انحسار فالإشهار"، على حساب هضرتو.
وقال مجاهد، فسردو لبعض ما جاء رسالتو لرئيس الحكومة، بللي على الرغم من هذ المشاكل اللي كتتخبط فيها المؤسسات، لكن هي مازالة مستمرة، وكتشتغل وكتقوم بأداء المهام ديالها بتفان، وكتلتزم بأداء أجور العاملين ديالها وكَاع نفقاتهم الضرورية.
وبالنسبة للإجراءات اللي دار المجلس باش يصوفي الصحافة من الإفلاس، كيقول مجاهد، فتصريحة ل"كود" دائما، باللي المجلس شكل لجنة متابعة لموضوع الأزمة، كتتكون من مجموعة من الفاعلين فالقطاع، "حيت الظرفية كتستدعي التعاون مع الناشرين والمسؤولين على المؤسسات الإعلامية والصحافيين وجميع العاملين، حيت كلشي فباطو واحد"، كيف قال.
وكيشوف مجاهد بللي خاص يتم إنقاذ الصحافة الاحترافية والمهنية فأقرب وقت ممكن، لأن الدور ديالها أساسي ومايمكنش الاستغناء عليه، وهذشي اللي أكداتو الظروف الحالية حيت هي اللي بينات ان الصحافة ملكية جماعية كتخدم المنفعة العامة، وعلى هذشي خاص الصحافيين ياخدو صاليراتهم وخاص المؤسسات تشتغل بشكلها الاعتيادي.
وقال رئيس المجلس بللي فمجموعة من الدول الديمقراطية، تم دعم قطاع الصحافة فظل ازمة كورونا، حيت واعيين باهميتها، وماعطاهمش خاطرهم يتفرجو فيها وهي كتختنق.
وللإشارة، فمجموعة من المؤسسات الإعلامية، ومنها "ماروك سوار" و"أوريزون بريس"، نقصو من أجور الصحافيين ديالهم، وغيستمر هذشي عندهم من شهرين حتى لثلث شهور، فالوقت اللي الجرائد الورقية وقفو بعض الخدامة ديال المطابع من الخدمة، حيت مابقاش عندهم منين يخلصوهم.