فرحوه تعليقات المغاربة وتفاعل معاها وبارتاجاها.. ها شكون السيد مول التقاشر حومر اللي جا مع الوفد الأمريكي الإسرائيلي لبارح – تغريدات وتصاور

آدم بولر، المدير التنفيذي لمؤسسة تمويل التنمية الدولية الأمريكية، اللي جا البارح الثلاثاء مع الوفد الأمريكي الإسرائيلي للمغرب، داير البوز بالمعقول اليوم فمواقع التواصل الاجتماعي المغربية.
بزاف بداو يتكلمو على بولر وتساءلو شكون، من بعد ما دارو تصاورو، وهو داير رجل على رجل، ولابس تقاشر فلون أورونج أو حمر مشعشع، فالوقيتة اللي كان كَالس فيها مع الوفد فحضرة الملك محمد السادس فالقصر الملكي فالرباط.
المغاربة ماقتصروش غير على هذشي، بل دازو عندو للكونت يقشبو عليه، الشيء اللي خداه هو بصدر رحب وعجبو الحال وبارتاجا عندو بعض التعليقات، من بينها تعليق المحامي المغربي مراد العجوطي، اللي تساءل شكون هو هذ الرجل الغريب اللي لابس هذ التقاشر، وهو يجاوبو: "عمرني نقول ليك".
وبارتاجا بولر عندو حتى تويت آخر ديال صفحة كتقول أن "تقاشرو الأورونج رمز للحرية والأخوى بين المغرب وإسرائيل"، وجاوب وقال: "كلام معقول".
وهكذا رجل الأعمال الأمريكي قدر يخطف الأنظار ويسرق الاهتمام، خصوصا وأنه كيتعمد يلبس تقاشر بألوان "أراك من بعيد" فبزاف دالمناسبات واللقاءات المهمة، بحال فلقاءو مع الفينيزويلي المعارض خوان كَوايدو، بالإضافة للقاءات أخرى وندوات لبس فيهم تقاشر بألوان غريبة، واخا من عادة المسؤولين يلبسو تقاشر بألوان غامقة أو كحلة.
وقبل هذشي، ففيديو ليه بمجرد وصولو للمغرب، تكلم آدم بولر، على سلسلة من الجهود اللي غتدار لتوسيع الاستثمار الأمريكي فالمغرب، وتعزيز دورو باعتبارو مركزا اقتصاديا للقارة الإفريقية.
وقال بولر أن هذشي كيتعلق ب3 مبادرات رئيسية غدخل 5 مليار دولار من الاستثمارات فالمغرب والمنطقة، وأكد أن المغرب غيولي بمثابة مركز إقليمي لبرنامج التجارة والاستثمار الإفريقي الجديد على مستوى القارة التابع للوكالة الأميركية للتنمية الدولية.
???????????????? According to @AdamUSDFC, HM King Mohamed VI stated as a comment related to these initiatives that "It is not the amount of money that matters, what matters is impact in people's lives". https://t.co/bkG9Z4LTDa
— Adil Mouline ???????? (@AdilMouline) December 22, 2020