حماة العربية مسطلين فقواعد لغة موليير وعندهم عقدة من التأنيث.. خرجو يطنزو حيت الأكاديمية الفرنسية كتحارب الأخطاء اللغوية على "كوفيد 19".. ونساو راسهم فاش نوضو حالة على مصطلح "كورونا" واعتبروه تهكم على مفردة "قرآن"

رباعة فالسوشل ميديا ماخلاوش للأكاديمية الفرنسية بالضحك والاستهزاء والطنز، بعدما صدرات توجيه للي كيهضرو بالفرانساوية باش يتكلمو على مرض "كوفيد 19" باعتبارو مؤنث وماشي مذكر، حفاظا على سلامة اللغة ووقاية ليها من كل خطأ شائع يقدر يميعها.
هذ الناس اللي مافاهمين والو على القواعد اللغوية اللي خاص تتحترم، مافهموش كَاع علاش الأكاديمية اعتبرات هذ المرض مؤنث وماشي مذكر، بزاف منهم طنزو وقالو فالتعليقات بللي "صدق ماشي راجل حكَلو كيدير هذ الفعايل"، وشي وحدين اعتبرو الأمر تبعكيك، ووحدين خرين قاليك حكَا "الفيمينيزم"، وشي وحدين كيخلطو بين كورونا و"كوفيد 19" وقاليك "إن كيد كورونا لعظيم"، وهذشي بلا ما يكلفو راسهم عناء يقراو لارتيكل مزيان.
هاذ خياتنا كيحساب ليهم أكاديمية عندها تاريخ غادي تصدر توجه بدون خلفية أو قواعد، إيه طلع بصح "كوفيد 19" مؤنث فاللغة الفرنسية، حيت مقابل المرض بالفرنسية هو La maladie، وهذي كلمة مؤنثة بالفرونسي، وبالتالي كنتكلمو على La maladie Covid-19، كذلك الجايحة بالفرونسي هي La pandémie، وحتى هي كلمة مؤنثة ممكن تشير للكوفيد، وبالتالي كنقولو La pandémie Covid-19، وحتى الوباء مؤنث L'épidémie Covid-19، أما بالنسبة لمفردة فيروس فكتبقى مذكر فالفرنسية، وبالتالي صحيح يتقال Le Coronavirus.
هذشي كَاع ما تسوقولو هذ الناس واخا جا فبيان الأكاديمية بالشرح الممل، والعبث أنهم قاليك كيتسناو من أكاديمية تاريخية عريقة هدفها صيانة اللغة الفرنسية وتخصصها لساني محض تجيب ليهم اللقاح على كورونا، وكيطنزو ويقولو "يا له من إنجاز عظيم" على زين الإنجاز اللي دايرين هوما شادين تيليفوناتهم وكالسين يكتبو عن جهل وينشرو فالكلخ فالوقت اللي الناس خاصها توعى بشلا أمور فهذ الأزمة.
اللغة عندها دور كبير فالتواصل وفحفظ الموروث الثقافي ديال مجتمع معين، ومن حق أفراد هذ المجتمع ومؤسساتو يدافعو عليها وفأي وقت، صوا كانت الازمة ولا ماكانتش، المشكل الكبير واللي كيفقص وكيبين سكيزوفرينيا هذ البشر هو أنهم كيضحكو حيت هذ القضية ديال "Le" و"La" ماغاتفيد البشرية فوالو، لكن هذ الناس هوما نيت اللي كتلقاهوم دايرين كوبي كولي لواحد طيكسط بليد بواحد اللغة عربية ركيكة ديال "أنشرها ولك الأجر" وحتى شي حد ما هضر، فيه حكَا والواد "لا يجوز تسمية "Corona" لأنها مشتقة من كلمة "Coran" وهو القرآن، ولعل هذا من كيد الكفار للمسلمين والعياد بالله" و"لا تقل كورونا لأن الغرب الكافر صنع هذا المصطلح شبيها بمفردة القرآن الكريم لتدنيسه، واكتف بقول المرض اللعين أو البلاء"، راه البلا هوما اللي بحالكم.
هذ الناس هوما نيت حماة اللغة العربية، اللي واخا الأزمة كاينة يصرون على استعمال ترجمة "الفيروس التاجي" عوض "كورونا"، هوما النيت اللي كيقدسو العربية ويعايرو "كود" حيت ختارت تتواصل مع الشعب بلغة الشعب الأم اللي كتثبت هويتو اكثر من أي لغة أخرى، لكن علاش هوما مايبغيوش اللي يستهزء بيهم حيت كيدافعو على لغة ماشي حتى لغة علم، ويطنزو على مجتمعات أخرى اختارت الدفاع على لغتها حتى هي؟ علاش الذيب حلال الذيب حرام علاش؟
بلا مانهضرو على واحد الطائفة خرى أفرادها عندهم عقدة من لغة موليير حيت عمرهم قدرو يفهمو فيها حرف، وكيخرجو كلما سنحات ليهم الفرصة باش يفجرو أحقادهم ويفرغو مكبوتات العصا اللي كلاوه فالبتدائي بسبب نقطهم الزينة فالكونجيكَيزون والكَرامير، بلا مانهضرو على أعداء المرأة اللي قاليك لاواه الفيمينيزم وحقوق النساء، واش العيالات الفرنسيات محتاجين ل"La" ولا "Le" ديال "كوفيد 19" أصلا باش يعيشو بكرامة وياخدو حقهم يا الكوانب؟