واش غادي يكركبو زيان. دورة غير عادية للمجلس السياسي للسبع.. شارية ل"كود": درناها لوقف النزيف والمجلس لبى نداء الحركة التصحيحية… وبوجمعة: كفى من العبث السياسي والخرجات الحمقا اللي كتضرب فالمؤسسات

عقد المجلس السياسي للحزب اللبرالي الحر، اليوم السبت فالرباط، دورة غير عادية، من أجل البث فقرارات الطرد اللي اتخذها محمد زيان، المنسق الوطني للحزب، فحق مجموعة من الأعضاء، من بينهم عضو المكتب السياسي إسحاق شارية، ورئيس الحركة التصحيحية بالإضافة للبث فالاستقالات المقدمة،
وقبل انتهاء اللقاء، اللي غيتم البث فيه فهذ القرارات، قال إسحاق شارية فتصريحو ل"كود" أن "اليوم هو يوم مشهود، بحيث المجلس السياسي كامل تعبأ ولبى نداءات الحركة التصحيحية، ونداء المسؤول على التواصل بناسف الغنيمي، اللي قام بجمع ورقة من أجل جمع المجلس السياسي من أجل دورة غير عادية.
وزاد: "كنتمناو المخرجات ديال هذ الدورة تكون فيها قرارات حاسمة، للحد من هذ النزيف المستمر، وغنكونو فرحانين إلى فعلا المجلس السياسي صدر قرارات جريئة باش نوقفو إشاعات أن هذا حزب زيان".
وأكد أن "هذا حزب كافة المناضلين اللي تعبؤوا وجاو باش يقولو أن الحزب ليس حزب فرد، بل حزب مجموعة من المناضلين اللي كانو من المؤسذين ديال الحزب منذ 2001".
ومن جهتو، قال أنور بن بوجمعة، رئيس الحركة التصحيحية فالحزب، أنه خاص "القطع مع الشوفينية والدكتاتورية دالمنسق الوطني" حيت "كان غياب أي تنسيق مع الأطر ديال الحزب، وبسباب هذشي قررنا باش يوصل هذشي للمجلس السياسي الآن، لاعطاء النصاب الحقيقي لتطوير العطاء السياسي والقطع مع سياسة العبث والانتقادات تجاه المؤسسات والثوابت".
وأضاف "كفى من العبث السياسي والخرجات الحمقاء والقرارات العشوائية غير الحكيمة، لتطوير العطاء السياسي، اللي كيحترمو الثوابت نقول للجيل القديم الذي لا يفكر في مصلحة الحزب واختلطت الشخصية بالمصالح الحزب هناك عهد جديد وإشراقة جديدة وحقيقية من أجل وطن يسعه الجميع".
وجميع المتدخلين، فمقدمة اللقاء، عبرو على رفضهم لقرارات زيان، اللي اعتبروها جائرة وأحادية الجانب، وخاص اتخاذ قرار مستعجل للبث فيها.