مسؤول ف"كازا ترونسبور" كيشرح عبر "كود" الأضرار اللي لحقات الطرامواي بسباب الفيضانات: جوج عربات اللي تقاسو وها فين.. وها كيفاش تم التدخل لتأمين حركة السير – تصاور

صور كثيرة ديال عربات طرامواي تضررات بشكل كبير بسباب فيضانات كازا كيتداولوها على مواقع التواصل الاجتماعي، خلات متابعين كثار يطرحو سؤال على حجم هذ الأضرار، وواش حركة السير فالطرامواي رجعات لطبيعتها والمياه رجعات لمجاريها كيف كيقولو أو أن المشكل مازال قائم؟
باش تلقى جواب على هذ التساؤلات، "كود" تواصلات مع مسؤول فشركة "كازا ترونسبور" اللي مكلفة بكل ما ليه علاقة بالنقل فالمدينة، واللي قال أن الضرر ماشملش بزاف دالعربات كيف كيروج، لكن غير جوج فقط اللي تقاسو بسباب الما، و"هذ الضرر كان من بعد نهاية الخدمة، وبالتالي المسافرين ماحسوش بالتأخير وماتعطلوش على وجهاتهم بسباب هذشي", على حد تعبيرو.
وزاد المسؤول فحديثو ل"كود" أن العربات تقاسو فمنحدرات كانو عامرين بالما، عربة وحدة كانت فمنطقة باشكو والثانية فجيهة الوفاق، وداك الساعة تدخلات شركة "ليديك"، المكلفة بالتطهير السائل فكازا، باش تحيد الما من العربات وتأمن حركة السير.
وكشف المسؤول أن العربات بجوج راهوم فالديبو دابا، وهوما خارج الخدمة حتى يتم تقييم الأضرار اللي لحقات بيهم من طرف المتخصصين.
وأكد أن "ليديك" تكلفات باش تحيد الما من طريق الطرام وكانت تعبئة كبيرة من طرفها، وفالصباح بدا الخدمة ديالو بشكل عادي، وماكان حتى شي تأخر أو مشكل ديال المياه، "كيف أن "ليديك" تكلفات فالصباح باش تحيد المياه من سكك الطرام قبل ما يدوز"، كيف قال.