بؤرة السردين المصبر فالعرايش.. مصدر ل"كود": مازال غتبان إصابات جديدة وممكن يكونو العاملات تقاسو بسباب شي سلعة جات من السبليون

فحديث شخص مقرب لإحدى المصابات بفيروس كورونا فبؤرة العرائش، قال بللي الأمر كيتعلق بمعمل ديال السردين المصبر، اللي تقاسو فيه مجموعة من العاملات، واللي الأغلبية ديالهم مشاو لمستشفى لالة مريم فالعرايش، وبعضهم لاخر سافطوهم لمستشفى فحي بوشويكة فمدينة لقصر الكبير بعدما عرف مستشفى العرايش نوع من الضغط والاكتظاظ.
وقال المصدر نفسو بللي مازال كاينين إصابات أخرى كثيرة باقيين كيتسناو النتائج ديالها، وبالتالي أعداد الإصابات مازال غادي ترتفع، كيف أكد بللي المخالطين اللي دارو التحاليل كينين فالحجر الصحي دابا، لكن كاين مزال عمال خرين ماداروش الحجر ولا حتى التحاليل، والتحاليل توقفو.
وبخصوص سبب الإصابة بالفيروس وانتقال العدوى، كيقول أنه مازال لحد الساعة ما تحدد، لكن فبزاف دالعمال كيرجحو يكونو تقاسو بالفيروس بسباب باكيات ديال البلاستيك جاوهوم من سبانيا.
وحولات "كود" تتصل بالمديرة الجهوية للصحة فجهة طنجة تطوان الحسيمة، بالإضافة للاتصال برقم المديرية دالفيكس، من أجل أخد مزيد من المعطيات حول الموضوع، لكن حتى شي حد ما جاوب.
وحسب آخر تحديث علنات عليه المديرية الجهوية لجهة طنجة تطوان الحسيمة، فالصفحة الرسمية ديالها فموقع التواصل الاجتماعي "فيسبوك"، فكتجي العرائش فالمركز الثاني على مستوى عدد الإصابات بالفيروس ب62 إصابة، من بعد طنجة اللي كتحتل المركز الأول ب293 إصابة، وفمن المرجح هذ العدد يرتفع فاش يتم الإعلان على مجموع الإصابات اليوم مع 6.
وفتحات اليوم المدبرية الجهوية دجهة الشمال باب التطوع فوجه الاطر الصحية المتقاعدة والحاصلين على ديبلومات فمجال الصحة، باش يقابلو مرضى "كوفيد 19" فالمنطقة.