مسؤول ف"ليديك" للكزاويين: سمحو لينا على الإزعاج اللي تسببات فيه الفيضانات وراه درنا جهدنا

قال كمال الكَراكَعي، مدير مساعد بمديرية استغلال الماء والتطهير ب"ليديك"، على هامش الفيضانات البي هزات كازا، أن الشركة كتعتذر للزبناء ديالها والساكنة على الإزعاج الناتج عن التساقطات المطرية القياسية.
وقال الكَراكَعي، فتسجيل صوتي معمم للصحافة، أن هذ التساقطات وصل المتوسط ديالها ل33,7 ميليمتر. بين الساعة 4 دالعشية و9 دالليل، وبلغات أقصى التساقطات 56 ميليمتر، فمجموعة من المناطق.
وفصل الكَراكَعي فالوسائل البشرية والآلية اللي اعتمداتها "ليديك" للحد من اضرار التساقطات المطرية، بحيث كلفات بهذ المهمة 358 عون ضمنهم أطر وعمال التدخلات المختصين في مجال التطهير السائل، بالإضافة ل233 وحدة آلية.
وقال المسؤول فتصريحو أن هذشي تم بمجرد التوصل بنشرة أحوال الطقس من المديرية العامة للأرصاد الجوية.
وسرد الكَراكَعي مشاريع خدامة عليهم الشركة فمجال التطهير السائل لحماية عدد من المناطق اللي كتشهد تدفقات مائية كبيرة، ومنها "مشروع سرداب حي السدري، اللي بلغ الاستثمار ديالو 182 مليون ديال الدرهم، واللي غتنتهي الاشغال ديالو قريبا، وكذا مشروع نظام التطهير السائل بالطريق الوطنية رقم 1 على مستوى ليساسفة، واللي هو مشروع ضخم كتبغ تكلفتو 313,5 مليون درهم واللي غيكون جاهز في متم سنة 2021، بالإضافة لمشاريع كبرى أخرى يتم إنجازها لقوية شبكة التطهير بمجال التراب للتدبير المفوض"، على حد تعبيرو.