اللي حرثو الجمل دكو. البيجيدي هو اكبر مستفيد من هاد القاسم الانتخابي: كان قريب يتقسم وهو يتجمع ولمضاربة بين الاعيان غادي يشتت الاصوات بين الاحزاب وقيادي منو ل"كود": بحال مسيرة ولد زروال حتى حد ما غادي يتحاسب معانا

هاد القاسم الانتخابي اللي صوتات عليه الاغلبية والمعارضة السيمانا اللي فاتت هاد الهدف ديالو عدم السماح لحزب العدالة والتنمية باش يربح الانتخابات التشريعية اللي غادية تكون هاد العام. هاد الشي علاش وقع عزل ليه فهاد التصويت. كان بوحدو ضد هاد القاسم الانتخابي.
لكن ما وقع بعد ذلك كان فصالح البي جي دي. ممكن جدا يولي هاد الحزب المستفيد الاول فاللخر من هاد "القاسم الانتخابي". كيفاش؟
داخليا شفنا كيفاش هاد التصويت خلى الحزب يتجمع. خلى هادوك اللي كانو مقلقين وغاضبين وكانت امكانية انو يوقع فيه انشقاق٬ هاد الشي كولو تنسى.
الحزب تلقى ضربات كبيرة بسباب فشلو فتدبير ملفات كبيرة منها توقيع رئيس الحكومة الامين العام للحزب بنعرفة على اتفاقية ثلاثية مع اسرائيل وامريكا ثم تدبيرو للخلاف الداخلي. هاد الشي قوى جبهة معارضة وصلات حتى استقالة رئيس المجلس الوطني ادريس الادريسي الازمي قبل ايام من منصبو. كلشي تخربق فالحزب.
جا هاد القاسم الانتخابي وشفنا ان اكبر هاجمو ودافع على موقف الحزب هو الازمي براسو. البارح كان حدث اخر نشراتو "كود". بنعرفة زار بنكيران فدارو. هاد الاخير كان هدد بالاستقالة من السياسة الى ناس الحزب صوتو لصالح مشروع تقنين الكيف اللي مازال كيتناقش فالمجلس الحكومي.
دابا الحزب غادي يخدم مزيان بهاد القانون ضدا على تمرير "القاسم الانتخابي". بنكيران نصح بنعرفة باش ما يوافقش على هاد قانون الكيف.
اذن الحزب تقوى ب"القاسم الانتخابي" بعد ضربات كثيرة. قيادي من الحزب قال ل"كود" "بعد هاد التصويت٬ ما غادينش نتحرجو وندافعو على حصيلة الحكومة. هاد الشي اللي وقع بحالو بحال مسيرة ولد زروال. خلات الناس تنسى كلشي وتتعاطف معانا. هادا دعم لينا واخا هما قلبو عكس هاد الشي".
نقطة اخرى غادية تكون فصالح الحزب هو ان البي جي دي منضابط بزاف. ساهل عليه دابا يقدم 92 شخصية تكون على رأس 92 لائحة بالاضافة الى لوائح جهوية خاصة بالنساء. فهاد 92 ممكن نشوف اسماء معروفة تكون فالرتبة الثانية. تزيد عليها ان هاد العدد من الدوائر غادي يخلي كاع قيادات الحزب تقريبا ينزلو لهاد الانتخابات.
فيما الاعيان اللي كل مرة فين كيرحلو غادي يسهل عليهم يقلبو علي الاحزاب الصغيرة الى رفضات الاحزاب لكبيرة ديرهم على رأس اللائحة. بهاد الشي ممكن جدا تتشتت الاصوات والرابح فهاد الفيلم هو البي جي دي. اللي جاب من الاصوات يقدر يربح بيهم شي مقعد.
الحزب كان ضعيف مع بنعرفة. عوض ما يخليو النظام الانتخابي كيف كان او عوض ما يديرو اخراج ذكي لهاد القاسم الانتخابي عطاو لامثال هشام المهاجري مول السوابق =عن دائرة شيشاوة باسم البام= يدافع على المشروع ويهاجم البي جي دي. دارو خدمة مسيرة ولد زروال وصافي