ثمن بنعرفة. كورة الثلج دالاساتذة المتعاقدين غادية وتكبر والمجتمع غادي ويشعل. كيشوف فرانسا نايضة والجزاير شاعلة وهو حاصل مع بنعرفة وشي متخلفين باغيين يغيرو الدستور ويحيدو اهم فصولو الديموقراطية: تعيين رئيس الحكومة

المغرب غادي يدفع ثمن بنعرفة. الثمن غادي يكون غالي. اللي راهن اما يربح البام فانتخابات 7 اكتوبر 2016 التشريعية واما نحرموها على بنكيران طلع ليه لحساب غالط. اييه مرحليا جابو بنعرفة فصفقة مازال ما تعرفناش على جميع تفاصيلها لحد الان بعد ما دارت كاع المعيقات الممكنة باش يدير عبد الاله بنكيران حكومتو. لكن هاد الشي عطى نتائج عكسية.
حكومة بلا شخصية. كيقودها رئيس حكومة بلا شخصية. ضعيف فالتحكم فتحالفو الحكومي. ضعيف فالتواصل مع المواطنين. ضعيف مع التعامل مع الشارع. نشوفو غير اللي واقع فالشارع مع قضية الاساتذة المتعاقدين. عبثي وصافي. كيفاش قضية بحال هادي وصلات لهاد الشي.
اولا كلشي ركب على ضعف شخصية رئيس الحكومة. ما قدرش يخرج ويواجه. هاد الشي خلى كاع المعارضين من العدل والاحسان ودوز على تنظيمات يسارية تركب على القضية. بل حتى شي استقلاليين مالين هاد الفكرة ديال التعاقد فالوظيفة العمومية٬ وهي فكرة مزيانة٬ خلاهم يصطفو مع الاساتذة المتعاقدين.
النتيجة كورة الثلج ديال المعارضة كبرات. كلشي زاد فيها شوية. شفنا مظاهرات كبيرة. بحال ايلي منظماها العدل والاحسان. نفس الوسائل اللوجيستيكية. من حقهم كتنظيم سياسي يلقى الفرص اللي كيتعطيها حكومة بنعرفة باش يبان ويوجه رسائلو السياسية. المشكلة اذن فرئاسة الجهاز التنفيذي اللي حتى داخليا ما متافقش علي تدبير هاد الملف.
تصورو كون كان رئيس حكومة قوي. عندو وسائل الاعلام العمومية. يخرج يدافع على وجهة نظر الحكومية. يدخل فالتحالف اللي باغي يستغل هاد الشي. والاهم يخاطب الرأي العام الوطني. المعركة معركة الرأي العام. اللي كسبها اليوم هي قضية الاساتذة المتعاقدين. هادو اساتذة قبلو بكل وعي وحرية اتفاق ورجعو فيه. اييه ومع ذلك بنعرفة خسر فهاد المعركة.
شخصية ضعيفة بحال بنعرفة خلات الامن يواجه الاساتذة المتعاقدين. هادي قضية حكومية ما كانش خاص الامن يتورط فيها. كون حكومة بنعرفة عرفات تدبرها ويديرها ما يوقعش اللي وقع. شفنا حتى نواب برلمانيين بحال نائب دائرة انفا بكازا عن الاشتراكي الموحد كيتحدث فسؤالو عن مجزرة. اييه سماها مجزرة. حتى هو كيدير السياسة وكيزايد. ففرنسا دگدگو اللي بغى يحتج فبلايص ممنوع فيها الاحتجاج وحتى جون لوك ميلانشون صديق الاشتراكي الموحد وشوية زايد عليهم فالتطرف٬ ما وصفتش اللي كيتعرض ليه المحتجون بالمجزرة. اذن الامن كيخلص ثمن تخربيق بنعرفة.
كاين وضع دولي كيسمح لدائرة الاحتجاج تكبر. ففرنسا عنف كبير ومسيرات كل سبت ديال الجيليات الصوفر. فرانسا بلد الثورات عندهم الاجهزة الكفيلة باش تتفاعل مع هاد الشي. امكانية اصلاحات دستورية يدوزو من جمهورية لجمهورية. راي عام كيقيسوه دوريا وكيعرفو اش بغى. اخر استطلاعات الرأي بينات باللي التعاطف الشعبي مع “الجيليات الصوفر” نقص وهاد الشي اثر بشكل مباشر علي اخر مسيرات الاحتجاج السبت اللي فات.
كاين كذلك ما يقع كل جمعة فالجزائر. رفض لنظام قتل الجزائريين. شعب كلشي ظن باللي الحرب اللي عرفها ضد التطرف فالتسعينات بعد نجاح الاسلاميين غادية تخلع كل واحد قرر يحتج. وقع الاحتجاج. ضغط الشارع عطى اكلو. دابا بوتفليقة اللي شحال وهو غايب ما غاديش يترشح. دستور جديد فالافق ومع ذلك الاحتجاجات ما سالاتش.
المغاربة كيشوفو جنبهم. حداهم كيلقاو هاد الشي. طبيعي قضية بحال الاساتذة المتعاقدين يركبو عليها كثار من الاطراف السياسية. وفهاد الوضع العام كيجي واحد محسوب علي التيار الديموقراطي زورا اللي هو ادريس لشكر الكاتب الاول للاتحاد الاشتراكي وباش حل فمو قال. خاص تغيير الفصل 47 من الدستور اللي كيقول خاص الملك يعين رئيس الحكومة من الحزب الاول فالانتخابات. من الفصول الديموقراطية فدستور 2011 باغي يغيرها هاد اللصقة اللي دمر حزبو. كيدير خدمة مطلوبة منو. الهدف هو البي جي دي ما ياخدش ولاية ثالثة. وشوفو على تخلف.
ايلي قاسو هاد الفصل غادية تشعل. لمغاربة غاديين يحسو بالشمتة. اي حاجة فيها شي ضو ديموقراطي يقضيو عليه.
دابا غاديين نخلصو ثمن بنعرفة ثمن اختيارو. كيفاش وشحال الثمن. هاد الشي ما يقدر يعرفو حد. الايام كافية تعطينا ثمن هاد الصفقة كولها