انتخاب اعضاء المكتب الفيدرالي للجمعية المغربية لناشري الصحف. كيفاش "كود" ولات عضو وما فراسها

البارح كان جمع عام استثنائي للجمعية المغربية لناشري الصحف فكازا. بصاح كان استثنائي بعد تأسيس الجمعية المغربية للاعلام والناشرين ومشى منها عدد من المؤسسين. هاد الجمع كانت فيه تعديلات على النظام الاساسي للفيدرالية اللي وصل العدد ل37 عضو بعد ما كان غير 27 فالسابق وتخلقات تنسيقات للجهويات والصحافة الورقية والصحافة الالكترونية.
الرئيس ولى ينتخب من قبل المؤتمر عوض المجلس الفيدرالية وتغيرات شكليات التصويت وشروط العضوية والترشح للاجهزة المقررة. كلشي هاد الشي ايجابي.
"كود" عضو فهاد الفيدرالية. كانت فالمكتب هادي سنوات. ما قدماتش استقالتها لا والو. غير هو ما حضراتش للجمع العام الاستثنائي لاسباب قاهرة. ما مثلها حتى حد لانو القانون قبل من يتعدل ما كيسمحش للتمثيلية.
بلاغ الجمع العام غير العادي للجمعية المغربية لناشري الصحف طلعات اسم كود كعضو فمجلس الفيدرالي. كنظن كاين شي خطأ غير مقصود. يمكن تسرب بدون سوء نية. حقاش ايلى بغات تكون عضو فشي هيئة غادية تقولها ماشي غادية تلقى راسها بدون علمها.
كود ايلى ما عجباتها الفيدرالية راه ممكن تستاقل ماشي باش تمشي للجمعية المغربية للاعلام والناشرين كيف دارو شي ناشرات واللي هما السباب فهاد الوضع الكارثي اللي وقع مؤخرا.
كود دابا كتقول باللي راها ماشي عضو فالمكتب الفيدرالي. نعاود نقولها حقاش ما حضراتش.
هاد الدينامية اللي كاينة بين الناشرين مزيانة بزاف. دينامية ديموقراطية. غادية تربح منها الصحافة. دابا كاين الرئيس هو نور الدين مفتاح ورئيس الجمعية الاخرى هو عبد المنعم دلمي. بجوجهم كيفهمو القطاع مزيان وبزاف. عندهم الخبرة وصحاب.
ولكن هاد الدينامية خاص يسولو اي واحد واش باغي يكون عضو ولا اللا قبل ما يديرو اسمو.
ونتمنى يحيدو اسم كود والتوفيق للجمعية اللي كود مازال حتى لدابا عضو فيها