البرلماني النقابي لي كيسلت من خدمتو ويسلت من البرلمان راه ماغادي يدافع لا على مواطنين لا على مستخدمين هذا أكثر واحد واكل ليهم رزقهم بارد وهذا هو لي خاص مخطط إستعجالي للقضاء على بحالو لأنهم كثار

برلماني ونقابي جرات عليه ريضال حيت مكانش كيجي للخدمة وكان كيوصي غير سيكوريتي يبوانتي ليه أو هو نيت كيجي الصباح يبوانتي ويمشي يتبرع بصالير المستشارين وصالير ريضال وفيلا كسكن وظيفي ممخلص فيها لا لما والا الضو أواه ، وطلع كذاب من لفوق ملي نشرات كود خبار سيفط بلاغ قاليك مجراوش عليه عليه و راه مكاين والو، من بعد سيفط بلاغ آخر كيتغبن جراو عليا تعسفا وليس من حق شركة فرنسية تقطع عليه الضو ولما والولاد كيوجدو للإمتحانات، عاد تفكر أنها شركة فرنسية ممنحقهاش تقطع الضو على المواطنين ملي كان خدام غيها شبح غير يبوانتي ويزيد مكانتش فرنسية داك الساعة كانت شركة مواطنة كتشتت الفلوس على المستخدمين بلا مايجيو، وفي نفس النهار ديال هاد الوضيح لي سيفط هاد البرلماني النقابي السلايتي حسب ريضال، في نفس النهار ديال هاد المادة لي تنشرات عليه وعلى أنه سلايتي ومسجل بالكاميرة كيجي يبوانتي ويدور مية، البرلمان دوزو قانون ديال تصفية 12 مليار من صندوق التقاعد غادا تفرق هاكاك عليهم، في عز أزمة كورونا فين المغاربة كلهم بمختلف طبقاتهم دوزو وعاشو هاد الأزمة غير بالتكافل بيناتهم، كينوضو البرلمانيين ويصوتوا على تفريق طناش لمليار بيناتهم.
البرلماني النقابي لي كيسلت من خدمتو ويسلت من البرلمان راه ماغادي يدافع لا على مواطنين لا على مستخدمين هذا أكثر واحد واكل ليهم رزقهم بارد وهذا هو لي خاص مخطط إستعجالي للقضاء على بحالو لأنهم كثار، هذا راه في شركة أجنبية وسلت، بحالو لي خدامين مع الدولة معرت شنو دايرين، أي إدارة ديال الدولة تضرب فيها دورة غادي تلقى بزاف من صحاب الصاليرات الكبيرة مكيستاهلوهمش وماكيديرو والو باش يستحقو هادوك المانضات، وحتى الى كانو مكيسلتوش وكيجيو يوميا للخدمة فراه الإنتاجية شبه منعدمة وهادو راه كيتخلصو من فلوس الدولة لي غير كتفرق وتضيع قبالت عينين المواطنين.
إلى غادي يكون مستقبلا شي نمودج تنموي ولا خطة للنهوض أو مبادرة، راه خاص تتركز أولا على محاربة المال السايب ديال الدولة لي كيمشي لناس مكيديرو حتى حاجة، صاليرات كثيرة كتعطى لمن لا يستحقها عاد زيد عليه مصاريف التفاطح والسفريات وشلا حاجات، راه خاص مراقبة حقيقية لهادشي أو الخوصصة للقطاع الخاص لي عندو الكبدة باش مايتعرضش لإبتزاز النقابيين أو المسؤولين السلايتية، ويعاقب أي واحد مبررش الصالير ديالو بالخدمة والكفائة لي خاص، هاد البرلماني كون كان خدام فالدولة تلقاه حتى داك البوانتاج ديال الصباح مايبقاش يجي يديرو ، وبحالو عدد هادو لي خاص تحاربهم الدولة اونفوا بورتوس.