خصهم يحذرو علينا حتى حنا، البلاد مافيهاش غي المرافق الحيوية، فيها حتى حنا، والا ماحذروش علينا مزيان، راه تقدر تدخلينا السوسة ونديرو شي مصيبة.

—
الحذر واجب، الواليدة مسيكينة ديما كانت كتوصيني، رد البال أوليدي وحضي راسك والله ينقي طريقك من الشوك، والله يبعد عليك ولاد لحرام، ومضحكش أوليدي على بنات الناس راه كما تدين تدان، وكتزيد تقرى عليا داك الحديث ديال أترضاه لأختك.

الواليدة كتحمد الله يوميا حيث تزادت فالمغرب بلاد الأمن والآمان والدجاج والخضرة موجودة ومتنوعة، والسردين رخيص، والجامع قريب، وطبعا هادشي بالنسبة ليها هو هبة من عند الله ومن عند القيادة الرشيدة وبفضلها الواليدة مستمتعة بتواجدها فالمغرب ومفتاخرة بكونها مغربية.

لواليدة هبطات للمدينة وهي تلقى هادوك حذر دايرين السربيس، جاها داكشي غريب وهي تدور ليا تسولني مع قتليها راني كاتيب كنكتب العيلم، ولات كتستفتيني على أيتها حاجة، وحتى أنا مكنتقاداش كنبقى نشرح ونفسر حتى كتفهم، ديك الساعة كتقولي: ملي نتا أوليدي عارف هادشي كامل، نوض توضى ليك وصلي ليك شي ركيعات تقرب بيهم لمولاك، وللى سير ديرليك شي بيعة وشرية دير منها دويرة ودير موستقبالك، ونتا هاد لفهامة كلها والعام لي يجي يلقاك على الضس، واراهوما جاو من ورا الغنم ومافاهمين والو وغي ولاد 20 عام وتزوجو ودارو وليدات ودارو سقف جامعين ولادهم تحتو، ونتا باقي ماشبغتيش من هاد لفهامات الخاوية. أوليدي نتا راك عالم وظالم.

الواليدة: وا وليدي وشفت العسكر فالمدينة كثار، آش واقع أوليدي، قلب قلب أوليدي فلانطرنيط.
أنا: وا حذر هادوك الواليدة حذر.
الواليدة: ياك لاباس أوليدي حذر مناش، ياك ما الجزائر داخلة.
أنا: وعلى حساب ماقال وزير الداخلية، فراه هاد حذر مبادرة أمنية باش تطمئني نتي وباقي المغاربة والسياح بلي أنكم فآمان فالمغرب.
الواليدة: أنا أوليدي الحمد الله معمرة قلبي بالله ومطمئنة وتايقة فيه، وراني فآمان الحمد الله، والله يخلي لينا ماليكنا، والله ينجينا من الحساد، ولكن أوليدي علاش كاينين غي فالمدينة، علاش مايجيبوهمش للحومة عندنا، والله الى محتاجينهم كثر، عاد ول لبارح كريساو بنت خدوج، يالله مسكينة مخلصة وراجعة من المعمل، كون غي يجيبو هاد حذر عندنا، راه أوليدي وليتي تخاف تحل بزطامك فالسوق الشفرة عين بين، والسكايرية والحشايشية غي مستفين مع الحيوط، يجيو هاد حذر عندنا يهنيونا من هادشي.
أنا: وراه هادشي شغل البوليس ماشي العسكر الواليدة، وزايدون راه واقيلة دايرين هادشي على ود الإرهاب.
الواليدة: ومال الإرهاب أوليدي كاين فالمدينة حدا البيران، الإرهاب راه كاين هنا ومن هنا كيخرج، ياك عاد داك النهار شي لحايا شدو واحد لقاوه سكران سلخوه مزيان، هو الصراحة يستاهل وغزاو فيه، ولكن أوليدي ملي كنشوف داكشي ديال داعش فالتلفازة راه شعري كيوقف وكتشدني الخلعة منهم، يشدو السيمو سكران ويربيوه مزيانة، ولكن راه السيبة هاديك الى وللى لي جا يدير شرع يديه، راه كاين المخزن فالبلاد، هو لي خاص يدير خدمتو، السيبة مايبغيها حد أوليدي.
أنا: وا الواليدة، راه هاد حذر داروها غي باش يحميو المرافق الحيوية، ماشي باش يربيو السكايرية.
الواليدة: شناهوما هاد المرافق الحيوية أوليدي عاوتاني.
أنا : هوما الإدارات ديال الدولة، ولوطيلات وبلايص السياحة وكاع لبلايص لي فيهم موالين لفلوس والنصارة.
الواليدة: أوليدي موالين لفلوس فين غادي يوصلوهم أو يشوفوهم باش يتفركعو فيهم، راه كاتجي غي فالدراوش، وزايدون أوليدي هاد الإرهاب لي وللى دابا، راه كيتفركعو فالجوامع فالمدارس فالسويقات، راه كنشوفهم فالتلفازة أوليدي، صنادلهم كيبقاو غي مليوحين، غي الدراوش مساكن، أما موالين لفلوس راه عليهم العسة وعندهم لي يحذر عليهم، حنا مساكن لي معندنا حد، يجيو يحذرو علينا شوية.

أنا: ومالك الواليدة نتي، واش مرفق حيوي، الى تفركعو فيك غادي يتضرر الإقتصاد ديال الدولة، نتي راه مارابحين معاك والو، 100 درهم ديال الخضرة فالسيمانة، ودجاجة كتقصميها طراف، و300 درهم ديال الضو والما فالشهر، راه لي كتصرفي نتي كيعطيه غي سائح واحد تدويرة مع شي سرباي.
الواليدة: واييه أوليدي، حنا بلادنا بغينا ليها غي الخير، ودوك السياح راه معاهم مروجة الوقت شوية، ولكن أوليدي الى بغاو يحاربو الإرهاب راه خاص يجيو عندنا لهنا منين كيخرج وفين كيتزاد ويكبر ويسمان، ماشي يتسناوه حتى يهبط عندهم للمدينة واجد، مال ولد خالتك لي راه فسوريا دابا كانت عندو فيلا فالمدينة، راه غي ولد هنا، وأغلب لي مشاو راه غي ولاد الدراوش، الى بغاو يحاربو الإرهاب يجيو يقلعوه من الجدر ديالو هنا، ماشي حتى يكبر ويدير النوارة عاد يبغيو يقطعوه، راه واخا تقطعو غي تغيب عليه شوية ويعاود يكبر، الى بغيتي تتهنى خاص تقلعو من الجدر ديالو لي هو هنا.
أنا: الواليدة هاد الهدرة لي كتقولي غليضة بزاف، شكون لي وراك هادشي.
الواليدة: ومشات أوليدي ديك الوقت لي كنا فدار غفلون، كتخدم التلفازة مع الستة، دابا راه النيميريك فيه كاع لعجب، أما ديك دوزام والمغرب عندنا الى عولتي عليهم راك تبقى فدار غفلون.
أنا: واماتيقيش الواليدة بكاع داكشي لي كيجي فالتلفازة، راه كاين شي قنوات دايرينهم هادوك لي حاسدينا، غي باش يشوهو صورة المغرب.
الواليدة: أنا أوليدي كنتيق فسيدي ربي، وفماليكنا الله يخليه لينا، غي هو خاصو يحذر علينا حتى حنا، راه هاد البلاد مافيهاش غي المرافق الحيوية، فيها حتى حنا، والى ماحذرش علينا مزيان، راه تقدر تدخلينا السوسة أو يلعب بينا الشيطان ونديرو شي مصيبة.