أول تيليفيريك فالمغرب غيدار فطنجة وها شحال ساوي

قريب يدار "تيليفيريك" فطنجة، واللي كيتعتبر الأول من نوعو فالمغرب.
هذ المشروع صادقات عليه جماعة طنجة، نهاذ الثلاثاء فدورة استثنائية، ورصدات ليه غلاف مالي ديال 240 مليون درهم.
التيليفيريك اللي غيدار غيكون كيتحرك على طول مسافة 2 كيلومتر، وغيدوز على أربع محطات، برج النعام (القصبة)، والمحطة البحرية (ميناء طنجة المدينة)، والميناء الترفيهي (مارينا)، وساحة فارو (سور المعكَازين).
وغيدار المشروع على شطرين، وغتسمح الطاقة الاستعابية الإجمالية للعربات بنقل 2000 شخص.
وتلونصا طلب عروض لشركة من أجل تشييد المشروع وتسييرو لمدة 30 عام.
والشطر الاول من هذ المشروع غيكون واجد ف2024.