ردو البال.. الباس فاكسينال على شكل كارط صغيرة مامقبولش.. ولارام كتوصي وتعاود: خاص جواز التلقيح يكون مطبوع على ورقة كبيرة أو على فإيكرون التيليفون – تغريدة

موضة جديدة هي ديال الناس اللي كيطبعو الباس فاكسينال ديالهم بشكل مصغر، داير بحال الكارت ناسيونال، باش يديروه فبزطامهوم ويقدو يجبدوه بسهولة، بلا مايفهمو أن هذشي يقد يحلق ليهم مشكل، خصوصا إلى كانو خارجين المغرب.
لارم أكدات، فلاباج ديالها فتويتر، ان هذ الباس ديال التلقيح المصغر ماواكلش، حيت الكود ديالو كيكون صغير بزاف وماواضحش مزيان، وهكذا وصات الناس باش يتجنبو اعتمادو بهذ الشكل.
وقالت لارام أنه باش تكون جوازات التلقيح قابلة للقراءة بواسطة الأنظمة، خاص تتقدم فالشاشة الرقمية (التيليفون أو الأيباد) أو تكون مطبوعة على ورق كبيرة A4.
وزادت أنه ماكاتمكنش تتقرى الصور الرقمية المصغرة أو الأوراق المطوية.
من أجل أن تكون جوازات التلقيح قابلة للقراءة بواسطة الأنظمة ، يمكن تقديمها على شاشة رقمية (هاتف) أو مطبوعة على ورق A4. لا يمكن قراءة الصور الرقمية المصغرة أو الأوراق المطوية.
— Royal Air Maroc (@RAM_Maroc) August 5, 2021
وفتغريدة خرى، ذكرات لارام بأنه اللي بغا يخرج التراب الوطني خاصو لابدا يكون ملقح بشكل كامل، ويتسنى 14 اليوم بعد الجرعة الثانية ديال التلقيح، والا تكون عندو ضروري رخصة مغادرة التراب الوطني الاستثنائية.
تذكير : الأشخاص المصرح لهم بمغادرة التراب المغربي هم الأشخاص الذين تلقوا التلقيح بالكامل (الجرعة الثانية لأكثر من 14 يومًا), حاملي التصاريح الاستثنائية الصادرة عن السلطات المختصة، الأجانب والمغاربة المقيمين بالخارج.
— Royal Air Maroc (@RAM_Maroc) August 5, 2021