أودي أودي على بوانو وصحابو..المزايدات غير على المحروقات: شوفو كيفاش انبطحو قدام الأبناك ومقدوش يخرجو تقرير المهمة الاستطلاعية على أرباح الأبناك وكيفاش "ضمسو" المهمة حول "حيثان" الدقيق

مهام استطلاعية دارها البرلمان كثيرة في مهب الريح، حيث مقدوش النواب البرلمانيين يقيسو "الحيثان الكبار"، فحال المهمة الاستطلاعية حول الدقيق اللي ضمسوها بصفقة معروفة تبدلو فيها الأدوار ورئيس المهمة ردوه رئيس لجنة الداخلية وبالتالي ميمكنش يترأس مهمة استطلاعية تابعة لجنة أخرى، أما المهمة الاستطلاعية حول القطاع البنكي، فتاهي تضمسات بسبب "ضغوطات".
المهمة الاستطلاعية حول أرباح القطاع البنكي والمشاكل للي فيه، واللي كيترأسها عبد الله بوانو، بطل تقرير المحروقات ومروج 17 مليار أرباح شركات المحروقات، اليوم ضربها بسكتة حيث مقدش يجبد عليه الصداع سواء مع الفوق ولا مع الأبناك.
القصة وما فيها حسب مصادر "كود" أن هاد الاستطلاعية البرلمانية المؤقتة حول الأبناك تشكلت فمارس 2020، بدات خدمتها منذ 24 أكتوبر 2020، أي قبل بزاف من المهمة الاستطلاعية حول صفقات كورونا بوزراة الصحة، الأخيرة خرجات تقريرها، اما تقرير بوانو حول الأبناك "غبروه" بقدرة قادر.
عبد الله بوانو، رئيس المهمة الاستطلاعية المؤقتة حول قطاع مؤسسات الائتمان والهيئات المعتبرة في حكمها، علن في وقت سابق أن تقرر عقد اجتماع يوم 24 نونبر 2020 للاستماع لعرض مدير المركز البرلماني للابحاث والدراسات وذلك على الساعة العاشرة صباحا.
شي اعضاء المهمة الاستطلاعية مبغاوش يعترفو بلي "وقع بلوكاج" فوق للتقرير، بحيث معلومات "كود" تفيد بأنه خلال منتصف شهر يونيو كانت النسخة الأولية للتقرير جاهزة.
وحسب مصادر "كود" بوانو تلقى شي تقريعة من مسؤولين كبار، خلاه يضمس التقرير ويسكت.
بوانو كان كيهضر في أي مناسبة على تقرير المحروقات، ودرنا وفعلنا، ودبا فاش وصل للصح، وقرب للحيثان اللي كتحكم فعلا ف الاقتصاد، وما يسميه بعض المتخصصين ب"التحكم المالي". هنا حبس السيد وضربها ب"صقلة".
أودي أودي على بوانو وصحابو، كيف قال مصدر "كود" متبع هادشي ديال المهام الاستطلاعية.
فالورقة التقديمية لهاد المهمة الاستطلاعية قالو غادي يلقبو على الخلل لي كاين فالمنظومة البنكية، خصوصا هاد الارتفاع الكبير فالارباح ديالهم وفي المقابل نسبة النمو فبلادنا ضعيفة (تناقض الابناك كتربح بزاف فبلاد نسبة نموها ضعيفة).
الابناك عندها دور كبير بزاف سواء في توفير التمويلات وتدبير الودائع وتقديم الاستشارة للمقاولات وللحكومة، لكن "الناتج البنكي الخام الذي تحققه الأبناك بالمغرب كبير بموازاة مع أرباح مرتفعة، مع ضعف النمو الاقتصادي، وتفاقم عجز الميزان التجاري وارتفاع المديونية العمومية والوضعية المالية الصعبة للشركات العمومية، وارتفاع الديون المعلقة الأداء، وتراجع القروض الممنوحة للمقاولات في غالبية القطاعات في ظل تراجع نسبة الائتمان البنكي وتراجع حجم الودائع".
مصادر "كود" تتساءل :"واش بوانو تخلع ومقدش يجبد بنجلون ووالي بنك المغرب، ويحاسبهم بالتقرير اللي غبروه، نسخة من التقرير الأولية تناقشت، ومن بعد وقف نقاش بقرار من بوانو نفسه".
دبا البرلمانيين فلجنة كيشوفو هادشي لي واقع غريب بزاف.. كيفاش رئيس لجنة تفرعن وخرج عينيه ف ارباح المحروقات، ودبا سكت وتكمش، واش دار صفقة سياسية مع شي طرف ولا مع مسؤولين، واش واعدوه بشي منصب.. اسئلة كثيرة كاطرح.
"كود" اتصلت بوانو، لقات تلفون طافي. واتصلت بمقرر اللجنة كذلك مبغاش يتجاوب، غير قلنا ليه الموضوع قاليك جاتو شي تلفونو خصو يجاوب. ومن بعد مبقاش كيجاوب.
نرجعو لمسار اللجنة الاستطلاعية (كولشي موثق فالبوابة الالكترونية لمجلس النواب)، في يوم الجمعة 23 أبريل 2021 ابتداءا من الساعة الرابعة والنصف زوالا: اجتماع أعضاء المهمة عن بعد، للانكباب على صياغة التقرير التركيبي للمهمة.
الاثنين 3 ماي 2021 مباشرة بعد الجلسة العامة: اجتماع لمتابعة الانكباب على صياغة التقرير التركيبي للمهمة.
الجمعة 7 ماي 2021 ابتداءا من الساعة الرابعة والنصف زوالا: اجتماع عن بعد لأعضاء المهمة لمتابعة الانكباب على صياغة التقرير التركيبي للمهمة.
الثلاثاء 11 ماي 2021 ابتداءا من الساعة الثالثة والنصف زوالا: اجتماع عن بعد لأعضاء المهمة لمتابعة الانكباب على صياغة التقرير التركيبي للمهمة.
شحال من اجتماع غير على الانكباب على صياغة التقرير التركيبي للمهمة الاستطلاعية. وموجودهش.
جوج اعضاء بارزين فهاد المهمة الاستطلاعية قالو ل"كود" :"الكل مسؤول لكن بدرجه اكثر الرئيس ووالمقرر"، مؤكدين أن :"تشكلت لجان صغرى من أعضاء المهمة، حيث وزعت محاور التقرير فيما بينها، وتم تقديمها في اجتماعات انطلق النقاش حول مضامينها لكنه لم ينتهي".