توقعت مصادر ل"كود" ان تعود سفيرة المغرب في مدريد كريمة بنيعيش الى اسبانيا هاد السيمانا. السفيرة كانت استدعيت من قبل الخارجية المغربية هادي شي 5 اشهر تقريبا على خلفية استقبال الصبليون لزعيم البوليساريو ابراهيم غالي للعلاج بالتخبية. طبعا بعدها جات ازمة سماح السلطات المغربية لاكثر من 10 الاف مغربي فيهم شي 2000 قاصر يدخلو لسبتة. هاد الازمة ولات من الماضي كيف جا فخطاب الملك محمد السادس فذكرى ثورة الملك والشعب هادي يومين. الملك قال باللي تم الاشتغال مع "الطرف الإسباني، بكامل الهدوء والوضوح والمسؤولية" واكد ان الرباط تحرص على تعزيز =الثوابت التقليدية بين الدولتين= بالفهم المشترك لمصالح البلدين الجارين". محمد السادس قال انو تابع "شخصيا، وبشكل مباشر، سير الحوار، وتطور المفاوضات. ولم يكن هدفنا هو الخروج من هذه الأزمة فقط، وإنما أن نجعل منها فرصة لإعادة النظر في الأسس والمحددات، التي تحكم هذه العلاقات". واللي كيآكد ان السفيرة ترجع هاد السيمانا هو كلام الملك نفسو اللي قال فخطاب 20 غشت باللي كيطلع "بكل صدق وتفاؤل، لمواصلة العمل مع الحكومة الإسبانية، ومع رئيسها بيدرو سانشيث، من أجل تدشين مرحلة جديدة وغير مسبوقة، في العلاقات بين البلدين، على أساس الثقة والشفافية والاحترام المتبادل، والوفاء بالالتزامات". المنطقي ان السفيرة ترجع فاليوم الموالي لخدمتها.