منيب دايرة الريع العائلي ومازال مادارت فالطاجين ما يتحرق. مرشحة هي وبنتها وخوها فدائرة النواصر.. واعضاء حزب الشمعة عطاو عذر قبح من الزلة باش يبررو الفضيحة

بارطاجاو نشطاء على مواقع التواصل الاجتماعي، على نطاق واسع، منشور للائحة الحزب الاشتراكي الموحد البرلمانية بإقليم النواصر، كيفضحو فيها استغلال نبيلة منيب لقيادتها فالحزب، باش ترشح أفراد من عائلتها.
المنشور المتداول، بناء على اللائحة الصحيحة وغير المفبركة، كيقولو فيه النشطاء أن اللائحة كتضمن بنتها إيمان حجي، وخوها توفيق منيب، وعاد راجل بنتها أشرف والقاضي اللي هو وكيل اللائحة.
بمجرد ما تنشر الخبار بحال العافية وسط التبن، خرجو اعضاء الحزب وانصار منيب يدافعو عليها باستماتة، بعذر أقبح من زلة، بحيث كتب سعيد المزاح: "هاد الصورة اللي كيحاول بيها البعض يبين أن كلشي بحال بحال وأن الأحزاب ولات ضيعات عائلية".
وزاد المزاح، فتدوينة ليه، كياكد المنسوب لمنيب، بالقول أن والقاضي ماكتربطو حتى قرابة بمنيب، لكن فالمقابل "الرفيقة إيمان حجي والرفيق توفيق منيب يترشحان في لائحة النواصر ترشيحا نضاليا مساندا للرفيق أشرف، وبالتالي فوجودهم لا رائحة فيه للريع الحزبي العائلي"، وهذا اعتراف كامل الأركان بفضيحة أن 3 أفراد من عائلة منيب كلهم مرشحين فبلاصة وحدة، وفعلا كيشكلو ضيعة عائلية على خلاف ماقال.
وكاينين عناصر خرين كيحاولو يبررو بقول هضرة ديال الحماق، بحال ان اللائحة مفبركة وماشي صحيحة واخا المزاح أكد صحتها، ومنهم اللي مشا بعيد وقال أن الإقليم ممكن ياخد فيه الحزب مقعد واحد ويفوز بالتالي بيه وكيل اللائحة بناء على نظام أكبر بقية فإطار القاسم الانتخابي الجديد، وهذي محاولة تمويهية ماشاداش حيت لو هذ الحزب كسب ثقة المواطنين الكاملة وخدا اغلبية ساحقة من الأصوات كلنا نشوفو تركة وحدة كاملة فالبرلمان، خصوصا وأن منيب تاهيا مرشحة على رأس اللائحة الجهوية لكازا سطات.
نشطاء كثار عاقو بهذ المهزلة، وتعجبو لتبرير المزاح اللي كيزيد يأكد على هذ الفضيحة، ومنهم الناشطة فتيحة اعرور اللي قالت، فتدوينة ليها أن هذ الامر لا يمكن تبريره ابدا، خصوصا فاش كيتعلق الامر بالزعيم، فإشارة لمنيب، وزادت: "لا نريد عائلة لوبين أخرى في المغرب! وبلغني من مصادر موثوقة أن منيب كان خصها تغطي النواصر لكن أشرف كان بوحدو، وخصو 2 الناس اخرين، اتصلت به نبيلة قالت ليه غترشح معاك بنتي و خويا..."
وزادت أن تشبث منيب بالترشيح رغم فشلها لمرات عدة مخجل جدا، "انتصرت لذاتها ولم تنتصر لفكرة جمع الشتات وهاد قضية الترشيح النضالي منيب آخر من يمكن الحديث عنها أوالدفاع عنها في الوقت الذي حاربت فيه طاقات الحزب نساء ورجالا حتى يخلو لها الجو".