على قلة المهندسين. اللي عندو بوه فالعرس وصافي. ولد والعلو عطاوه جناح المغرب فاكسبو دبي

كلشي باغي يورث لعائلتو شي حاجة. فتح الله والعلو وزير المالية السابق مهلي فولدو مزيان. مدبر ليه على المارشيات لكبار. كيف طرا وجرا حتى جناح المغرب بالمعرض العالمي "اكسبو دبي 2020" ياخدو ولدو طارق ولعلو. بحال ايلى غير هو اللي مهندس فهاد لبلاد.
تصورو حدث كبير للمغرب بعد هاد الجايحة فدولة بحال الامارات ويعطيوه لولد الوزير السابق والقيادي الاتحادي السابق.
هاد المهندس قدم راسو مبدع لوكالة المغرب العربي للانباء. قاليك ان الجناح "ساحة كبيرة للابتكار"، قول ساحة كبيرة باش ولاد المسؤولين يورثو كلشي فهاد البلاد.
طبعا هادا راه ولد اتحادي كان كيخلع فالبرلمان فالسبعينات والثمانينات. فالحقيقة كان يدير لعائلتو علاش يرجعو وصافي.
الجناح المغربي راه فيه 22 بناية داروه بحال العمران المغربي من زناقي مضيقين بحال مدننا العتيقة وفيه نجاحات المغرب.
المشكلة ماشي فالجناح ولكن فاللي شرف على الجناح. راه معرض مشاركة فيه 190 دولة ولكن فالمغرب خداه ولد لوزير.
نفس هاد المهندس كان خدا مشروع مغربي كبير فباريس وهو المركز الثقافي المغربي.