فالصبليون تالفين فالدخول المدرسي. الوالدين ما عارفين والو واش يخدمو ولا يقابلو ولادهم والجهات كلها ويلغي بلغاه

باقية جوج سيمانات على ما تبدا لقراية. حيرة الاباء كبيرة. ما عارفينش واش يشريو لكتوبا واللبسة ولا اللا. شاكين واش ولادهم غاديين يمشيو للمدرسة ولا مشاو شحال الوقت غاديين يحضرو فيه للدروس قبل ما يعاودو يسدو المدارس ويديرو شي حجر جديدبهاد الشي بدات جريدة "البايس" الاسبانية مقالها. حيرة بحال اللي عندنا فالمغرب. غير هما هنا الحكومات المحلية فجهات المملكة الاسبانية اللي كتشرف على التعليم ماشي الحكومة المركزية.
قرار بحال هادا كيهم الدخول المدرسي كيخربق كلشي. الخدمة عند بعد او تاخد ايام باش تبقى مع ولادك او تفاهم مع شي عائلات اخرى على طريقة. فهاد الحالة توضح الجريدة الاسبانية "غادي يقلبو كل نهار على أم للداري. العائلات كلها تالفة ما عارفين واش يخدمو ولا اللا. واش ولادهم غاديين يقراو ولا اللا. كاين نقاش كبير فاعلامهم على هاد الموضوع المهم بزاف. يمكن اكثر المواضيع اللي كتناقش. الوضعية الوبائية اللي تكفسات هاد ليام خلات الشك كبر فموسم دراسي مشكوك فيه.كاين حكومات اقترحات 3 ايام لقراية فالمدرسة فالسيماناشي وحدين رافضين مجموعات فقاعات" اي كل تلميذ يكون بعيد على لاخر ما يقرب منو ما يلعب معاه. هاد الشي مكفس على يسدو المدارس حسب بعد خبراء التربية. حقاش يستحيل مع دراري صغار بلا ما نهدرو على نفسيتهم.
التعليم فهاد البلد اجباري. كيتعاقب اللي ما كيقريش ولدو. واش هاد الشي غادي يكون زمن كورونا؟ هاد الشي حتي هو كيتناقش
شي نقابات التعليم بحال جهة مدريد علنو على اضراب مع الدخول. قالو باللي فغياب ضمانات لحماية الاساتذة والتلاميذ من الڤيروس ما يمكنش تكون لقراية.
دابا كاين اجتماع بداية السيمانا بين وزيرة التربية الوطنية والمكلفين بالتعليم فالحكومات المحلية =بحال وزراء تعليم الجهة= باش يشوفو كيفاش يديرو مع الدخول المدرسي. تنسيق ما غاديش يكون عندو تأثير كبير على قرار الحكومات المحلية.
دابا باش الحكومة المركزية عطات لهاد الجهات تاخد القرارات مع هاد الجايحة٬ اي قرار تاخداتو الحكومة المركزية غادي يكون ثانوي.
المهم عندهم نقاش كبير بزاف على هاد الموضوع فالاعلام العمومي والخاص والاذاعات والصحف..... حكومة معارضة حكومات محلية واخصائيين ونقابيين واساتذة واطباء ومحليين. كلشي كيناقش. هاد الشي اللي غايب عندنا وما كايناش ريحتو