غرائب مشروع تكميم لمغاربة. البي جي دي استغلها سياسيا وبزاف واخا هو مول كلشي ورجال الاعمال اللي نقدو لبلاد من ازمة اقود بهادوك المساهمات لكبيرة ولاو شياطين

انك دوز مشروع بحال 22.20 اللي كيخص وسائل التواصل الاجتماعي فهاد الوقت فالمغرب وحتى غدا راك خاصك تكون غبي ومتخلف. راه يستحيل تراقب وسائل التواصل الاجتماعي الا بطريقة وحدة والحمد الله المغرب ما نقدروش عليها. هي تخلق انت فايسبوك ديالك وواتساب ديالك وتويتر ديالك. هادي دارتو الصين وتقدر ديرو غدا الهند ايلى بغات والدول المتقدمة فالتكنلوجيا. اما المغرب راه عبث انك دير قانون ضد هادو مبني على ضرب حرية التعبير.
هادا اللي وجدو راه شوهة. ولكن اجيو بعدا شكون مول المشروع. حكومة بنعرفة اللي كيترأسها حزب العدالة والتنمية. على الاقل باش كان بنكيران وكيطيح فشي امور بحال هادي كيخرج وكيقول ما فراسي والو. واخا ماشي منطقية ولكن كيقولها. دابا هادا بنعرفة سكت. قابل. وزراء حزبو شافو المشروع واحد فيهم اللي دار ملاحظات والباقي قبل هاد الشي. يمكن يكونو شي وزراء اخرين دارو شي ملاحظات. ما عرفناش حقاش قانونيا ما يتداول فالمجلس الحكومي خاصو يبقى سري.
يعني من حيث المبدأ هاد المشروع راه يستحيل يدوز وحتى ايلى داز راه ما صالح لوالو. حقاش ضد التاريخ ضد ما يعيشه الانسان فهاد الزمن.
ندوزو شكون اللي خاصو يتحاسب سياسيا. نظريا الحكومة بكافة مكوناتها وعمليا حزب العدالة والتنمية اللي مكلف برئاسة هاد الحكومة. حقاش رئيس الحكومة هو اللي كيوجد جدول الاعمال. دابا بنعرفة وجد هاد الشي باش واحد منو اللي هو وزير الدولة مصطفى الرميد يقول اللا. هنا كاين مشكل كبير. ثم باش ينوضو ناس البي جي دي عوض ما يديروش نقذ ذاتي يبداو يهاجمو حلفاءهم كيبين باستغلال سياسي مقاود لهاد الشي.
المسؤول الاول هو العدالة والتنمية على هاد المشروع. تنازلاتو هي استمرار لعدد من التنازلات دارها من نهار دارو هادو اللي فالحكومة انقلاب بيض ولا زرق على بنكيران. اذن هو اللي خاصو يتحاسب سياسيا على كلشي. من بعد فمرحلة ثانية يتحاسبو الحلفاء.
حزب ما بانش فالامور لكبيرة اللي كتهم مستقبل لبلاد. ما شفناش فلجنة اليقظة الاقتصادية ما شفناهش فهاد الجايحة. بان لينا زايد وصافي. التدبير والاجراءات دارت بعيدة عليه
كيبان لي تعدي كبير يتحاسب غير الاتحاد الاشتراكي. حزب عندو وزير واحد. المكانة الرمزية لهاد الحزب اللي كل مغربي كيحس براسو عندو شوية منو هو اللي خلى هاد الهجوم عليه ولكن بالمنطق راه كاينة حرب جاية من القانون الجنائي وواصلة لهاد المشروع القانون.
فهاد الشي اللي وقع بان امر اخر اكثر غريب هو شيطنة رجال الاعمال. كيفاش الفئة اللي ساهمات مساهمة كبيرة بزاف فالتخفيف من تبعات هاد الجايحة د"كورونا فيروس" ولات شيطان. بحال ايلى هاد رجال الاعمال هما اللي حطو هاد القانون. اللي كيفكر بحال هاكدا راه ما عارفش المغرب. المخزن اقوى من كلشي.
وهاد القانون دارتو حكومة كيسيرها العدالة والتنمية وهما معروفين بتوجههم الليبرالي اللي بعض المرات اكثر من الاحزاب الليبرالية. كيدافعو على مصالح الشركات. واهم من يعتقد ان هاد القانون دارتو الشركات. باغي يحور النقاش. شيطنة هاد رجال الاعمال اللي ساهمو فصندوق ضد تبعات "كورونا فيروس" استغلال سياسي وصافي. تسخينات لانتخابات 2021 التشريعية على الخصوص.
هاد القانون يبن حقارة سياسيين بين غباءهم. بين فئة عايشة فعالم اخر. جابو قانون يستحيل يطبق واخا صعيب بزاف بزاف يدوز فمغرب 2020.