اول وزيرة استهدفوها بالفايك نيوز هي الرميلي ومن اللي حاربها باش كانت مديرة جهوية تبادلات معاه السلط وخدات بلاصتو

من اغرب حفلات تبادل السلط فهاد الحكومة كانت بين نبيلة الرميلي وزيرة للصحة والحماية الاجتماعية، وسلفها خالد آيت الطالب.
علاش غريبة؟ حقاش مباشرة بعد تعيينها فالحكومة لخميس اللي فات، كانت عرضة لحملة فايك نيوز ضدها. نشرو باللي هاد المديرة الجهوية للصحة كان وزير الصحة اللي مشى خالد ايت الطالب عفاها بسباب اختلالات ووو.
المشكلة ان هاد الفايك نيوز خرج فمارس اللي فات وكانت فيه امال رديد مديرة مركز تحاقن الدم ضاربات مع شي طبيبة. بعد هاد الشي راسلات الوزارة عبر محامي وهاد الشي ممنوع قانونيا. الوزارة رسلات ليها اسبيكسيون. هنا خرجات هاد الاشاعة. وكانت كود" نشراتها فداك التاريخ. ما عمر الوزير السابق خدا شي قرار فحقها وما عمر شي لجنة من هاد الوزارة دارت شي مراقبة باش توقف اصلا على اختلاسات.
طبعا كان خالد ايت الطالب فاطار حروبو على اطر وزارة الصحة طلق اشاعة باللي غادي يعفي المديرة الجهوية للصحة اللي هي نبيلة الرميلي. تكلف بهاد الشي عضو فديوانو.
ايت الطالب ما كانش ضد نبيلة بوحدها. كان ضد كلشي. بل حتى باش نجحات وولات عمدة فكازا٬ قال لشي وحدين باللي غادي يعزلها. واش بعقلو هو ديك الساعة ما بقاش عندو اساس قانوني باش يعزل شي حد حقاش الحكومة ولات حكومة تصريف الاعمال بعد ما كلف الملك عزيز اخنوش اذاك يشكل حكومتو
تصورو هاد الشي كولو وامور كثيرة ويجي النهار اللي يتبادل فيها ايت الطالب السلط مع اللي كان يحاربها من التحت وهي نبيلة الرميلي. هادي غادية تاخد بلاصتو. على هاد الشي ماشي غريب هاد القضية ديال الاشاعة اللي خرجات عليها.
على هاد القبال قلنا اغرب تبادل سلط كان هو اللي وقع بيناتهم. الرميلي قالت باللي خاص التجنيد للاشتغال "بكل عزم وإرادة من أجل الاستجابة لانتظارات المواطنين في مجال الصحة الذي اعتبرته "قطاعا اجتماعيا بامتياز".
وطلبات جميع مهني الصحة فالقطاعين العام والخاص يتجندو بكل تفاني ومصداقية وادارة ويديرو يد فيد باش ينجحو هاد الورش الكبير. كما اكدات ان تحقيق برامج الحماية الاجتماعية تحتاج الخدمة فظروف مهنية جيدة "هناك أولويات تصب في انتظارات المواطنين وأخرى تهم مهنيي الصحة الذين يتعين أن يشتغلوا في ظروف مهنية جيدة".
باش تسد قوس ايت الطالب اكدات الرميلي باللي مرحلتها غادية تكون "مطبوعة بالعمل الدؤوب لما فيه مصلحة المواطن" اي باراكا من الحروب الداخلية اللي كتستنزف كلشي.
ايت الطالب بان تالف وبغى يدافع علي ناس الصحة ولكن جا معطل. هدر على كفاءتهم.
الرميلي بالاضافة الى الفايك نيوز اللي خرج عليها، كاين نقاش هادا صحي على الاقل على واش ممكن يكون الشخص وزير فالحكومة فقطاع حيوي بحال الصحة وعمدة مدينة بحال كازا. نقاش عندو مؤيدين وعندو معارضين. لمغاربة غاديين يشوفو النتيجة بعد ما تبدا الخدمة او نديرو بحال الغرب، بعد مائة يوم من الخدمة. ديك الساعة يبان كلشي