الباطل طايح وفايك نيوز محيحة اليوم والضحايا اخنوش والحقاوي. سكنو بسيمة ففيلا فالسودان وجهضو لقاء لاخنوش فباريس بفيديو قديم كان فيه الناصري ولقاء مازال ما تنظمش

الفايك نيوز محيحة اليوم السبت. مع الفراغ المهول اللي داروه السياسيين كاينة غير الاشاعة اللي منتاشرة. الاشاعة ديال البارح واليوم ضحيتها كلا من عزيز اخنوش رئيس التجمع الوطني للاحرار وزير الفلاحة والصيد البحري والتنمية الفلاحية والغابات وبسيمة حقاوي وزيرة الاسرة والتضامن والتنمية الاجتماعية.
تنشر فيديو قديم كيعود لبداية 20 فبراير 2011 ورجعوه لنشاط حزبي مازال ما داروش اخنوش كاع فباريس. يتعلق الامر بنشاط كان حاضر ليه الناطق الرسمي باسم الحكومة حينها خالد الناصري بمعرض العقار بباريس. جاو محتجين عندهم حسابات مع النظام الملكي وهجمو حينها على ندوة كان منشطها محمد برادة مدير السابق ل"سبريس" ودخل سمير الشماغ المنظم للحدث وشد لي نعكل ليك. المهم اليوم صبح فيديو ديال هاداك النشاط ولصقو فيه باللي تم نسف نشاط ديال رئيس التجمع الوطني للاحرار مع تجمعيي العالم بباريس. المشكلة ان هاد النشاط مازال ما دارش. يتوقع يتنظم غدا فباريس. يعني كلشي فايك نيوز وكذوب
////
الفايك نيوز الثاني على بسيمة حقاوي. الوزيرة اللي كذبو عليها ف20 درهم ويعيشو بيها لمغاربة زادو كذبو عليها ونشرو فيلا قالو ساكنة فيها فالرباط. عائشة عباسي٬ احدى مستشارات الوزيرة نشرت في صفحتها توضيحا في الاول كتقول باللي بسيمة ما عندها حتى شي دار فالرباط وان هاديك الفيلا ما عندها علاقة بمحل سكناها. ثم اضافت في وقت لاحق ان الفيلا اللي قالو ديالها طلعات فشي اعلان فالسودان ماشي كاع فالمغرب.
الاشاعات كثار كاينين اللي مستافدين منها. الاشاعة يقدر اي واحد يبدا يوظفها غير باش تولي داخلة فالثقافة ديال شعب ما يبقى حتى حد يتحكم فيها. يقدرو يقولوها اليوم على وزير وغدا على رئيس الدولة. كنتكلم على الاشاعة اللي كتخرج من عندنا فالمغرب