صحاب التقدم والاشتراكية ترجلو على صحاب المصباح. انتاخبو بنعبد الله لولاية ثالثة وتحداو المخزن اللي عاقبهم على تحالفهم مع بنكيران

“شكرا جزيلا من الأعماق لكل مناضلات ومناضلي الحزب على هذه الثقة المجددة وعلى استعدادهم لمواصلة النضال معا من أجل مغرب الديمقراطية والتقدم والعدالة الاجتماعية” بهاد العبارات شكر محمد نبيل بنعبد الله الامين العام لحزب التقدم والاشتراكية اللي ربح ولاية ثالثة على هاد الحزب الصغير واللي كبر معاه وبزاف.
نبيل بنعبد الله ربح ب371 صوت مقابل 92 صوت جابها منافسه سعيد فكاك. ربح رغم كاع الفايك نيوز اللي تسربات قبل وخلال المؤتمر وكلها من جهات باينة ومعروفة باش ما يطلعش بنعبد الله. لكن الحزب الشيوعي السابق طلعو اعضاؤو رجالة وما داوها فحاجة ماشي بحال ناس العدالة والتنمية اللي حقق ليهم بنكيران اللي ما عمر شي قيادي حققو وفالاخير لاحوه باش يحافظو على مناصبهم اللي جات بخدمتو.
ناس البي جي دي خافو من المخزن خافو من يخسرو مناصبهم خافو خافو وخافو. والغريب ان التقدم والاشتراكية كلا لعصا بزاف منذ تحالفه مع بنكيران وشارك فالحكومة. كان اول واحد يترجل مع الحزب الاسلامي. ربح مقاعد مهمة فالحكومة: 4 فالتعمير والسكنى وفالصحة وفالتشغيل بالاضافة الى كتابة الماء. ربح بحالو بحال احزاب عندها ضعف مقاعدو فالبرلمان. جات حكومة بنعرفة الحزب واصل تحالفو وحافظ على كاع المقاعد باستثناء الشغل.
ولكن بين هاد الشي جا زلزال الحسيمة وكان الاحتجاج على امور كثيرة الا السكنى ولكن طيرو نبيل بنعبد الله. طار ماشي على المشاريع اللي تعطلات فالقطاع اللي كان كيشرف عليه وهو السكنى والتعمير =حقاش حراك الريف ما احتجش علي هاد القطاع٬ طار على هاداك التحالف. طيرو معاه وزير الصحة الحسين الوردي.
كان استهداف الحزب واضح. كان استهداف نبيل بنعبد الله واضح. قبل من هاد الشي كان جبد نبيل بنعبد الله فؤاد عالي الهمة فحوارو مع “الايام” خرج فيه بيان من الديوان الملكي.
مع ذلك استمر وكلشي كان يتوقع نهاية قريبة وخرجو ليه هاديك الهبلة فالسياسة نزهة الصقلي اللي كان شي نهار وزارة ودفعوها من جهة حتى حزبها ما عرفهاش. خرجات فدوزيم باش تهاجم قيادة الحزب. فشل كلشي. حتى فالانتخابات التشريعية مارسو ضغوط على هاد الحزب الصغير وكلشي عاقل على وكيل لائحتو فسلا كيفاش خاف وهرب واخا كان عندو حظوظ كبيرة يدي مقعد. خاو الطريق للتراكتور اللي دارو ليه كلشي وما ربح والو.
اعطاء 80 بالمائة من اصوات الحزب لنبيل بنعبد الله وولاية ثالثة رسالة شكر من هاد الحزب لهاد السياسي العفريت والجن. جن حقاش رجع حزب لمغاربة كيعرفوه بعلي يعتة بوحدو لحزب عندو شان وما عندوش مع الهمة