وقاحة بوريطة وتوريطو لرئيس الدولة. كيفاش بغى يحمل المسؤولية لوزير الصحة. راه السفرا والقناصلة هما اللي كيعانيو بحال لمغاربة اللي ولاو مشردين برا. فيديو ليهم: صاحب الجلالة لا تتخلى عنا

البارح "كود" خرجات خبار على ان عودة المغاربة اللي حصلو برا قريبة وباللي فالسيمانا الجاية غادية تبدا عمليات العودة. ناصر بوريطة وزير الخارجية والتعاون خرج فصحف ومواقع اخبارية منها "كود" بتصريح مثير. ف"كود" غاديين نسلمو باللي ما كاينة حتى شي علاقة بالموضوع اللي نشرنا وبخرجاتو.
بوريطة حمل المسؤولية كلها لوزير الصحة خالد ايت الطالب. قال وزير الخارجية ل"كود" "من الناحية المبدئية وزير الصحة هو اللي كيقرر، وراه هو اللّي قال انديرو الكمامات وقال منبقاش نصليو فالمساجد، ووزارته هي من قررت الحجر الصحي، وهادي جائحة صحية وطبيعي أن وزير الصحة هو اللي كيقرر". هادا هو التصريح الخطير. الباقي انشاء ونيك فالهدرة وصافي. ما فيه والو.
بوريطة اوركسترا خرجة بنفس المعطيات فصحف كثيرة. ما غاديش نهدر على التضامن الحكومي. حقاش فحكومة بنعرفة راه رئيس الحكومة ما متضامنينش معاه او هو فوص نوت بيناتهم. ثم اللي كيعرف بوريطة كيعرف باللي اخر حاجة يفكر فيها هو التضامن مع شي حد. هو كلشي خاصو يكون تحت الإمرة ديالو. يخدمو. لقى هاد بنعرفة ضعيف داير ما بغى فهاد الشي.
وزير الصحة دار اخطاء كثيرة فتدبيرو للجايحة. غير فهادي راه ماشي سوقو ولا شغلو. هادي قضية فيها تداخلات. فيها قطاعات كثيرة.
كنهدر على مهمتو كوزير خارجية. كتعرفو السياسة الخارجية للدولة بيد رئيس الدولة ماشي رئيس الحكومة. هو ووزير الصحة بجوج ماشي متحزبين. يعني ديال الدولة ماشي ديال الاحزاب. المهم ان هاد الخرجة فيها اساءة اولا لرئيس الدولة. فيها اساءة كذلك للمغاربة اللي حاصلين برا. الرقم اللي كاين دابا راهم فحدود 40 الف مغربي كان لظرف معين برا وتسدات الحدود مع هاد الجايحة وبقى حاصل. فيه اساءة للقناصلة للسفرا حقاش هما اللي كيواجهو هاد المشكل. كثار فيهم عيى بزاف بهاد الشي. ما فاهمينش علاش ما دخلوش هاد المواطنين. ما فاهمينش كيفاش كتخسر الدولة لفلوس عليهم وبهاد الفلوس كان ممكن يدخلو فطيارة ويسكنو فاورطيلات او اقامات فالمغرب وبعد 14 يوم يمشيو لديورهم. او يديرو ليهم تيست ويفرضو على اللي فيه الفيروس حجر.
علاش رئيس الدولة من غير القضية ديال الاشراف ديالو علي السياسة الخارجية. حقاش يا السي المجتهد يا بوريطة. باش دار واحد الفيديو مؤثر بزاف من عدد من الفيديوات ديال هاد المغاربة اللي حاصلين٬ ما فراسهمش اصلا واش انت فالحكومة. قصدو مول لبلاد. فيديو تضامن معاهم سعيد التغماوي النجم السينمائي المغربي اللي كيمثل فهوليود وغيرها. يعني خاص هاد الشي يتحل اليوم قبل غدا ولا الثمن ديالو غادي يكون كبير بزاف وماشي ليك انت. لرئيس الدولة للدولة المغربية لصورتها اللي توسخات بهاد الشي.
هاد الفيديو يا السي وزير الخارجية رسالتو واضحة وقوية. هاد لمغاربة اللي قالو باش تصايب الفيديو ان عددهم اكثر من 27 الف٬ وجهو رسالة للملك "صاحب الجلالة لا تتخلى عنا" وزادو "وحدك تستطيع ايقاف معاناتنا". اذن اللي كيواجد هاد الشي هو رئيس الدولة. الصورة اللي ممكن تتمس هي صورتو هو. ماشي صورة وزير ما لقى ما يدار قال اه حگى وزير الصحة هو المسؤول.
وزير الصحة كون كنت منو ما يعقلش عليك. الثمن الرمزي كيخلصو رئيس الدولة ولكن الثمن السياسي تجاوزا انت يا ناصر بوريطة اللي غادي تخلصو. انت كون درتي خدمتك من الاول مزيان وكون كانت عندك الجرأة من بعد وتمشي عند رئيس الدولة وتقول ليه ها اللي واقع وخاص لمغاربة يدخلو٬ كاع ما نوصلو لهاد الشي. طبعا ما نكونوش سدج كذلك. راه كاع اجهزة الدولة فخبارها. غير بعض المرات مزيان يمشي وزير لرئيس الدولة يقولها ليه واخا يكون هاد الوزير عارف باللي مول لبلاد فخبارو.
لبلاد كانت صورتها مع بداية هاد الجايحة زوينة. صورتها برا واعرة كاع خاصة فقضية الكمايم. دابا هاد الصورة تمسات. شي صحافيين فاسبانيا قالو ان الباسبور المغربي بحالو بحال باسبور اسبانيا زمن فرانكو. بجوجهم ما كيسمعوش للمواطنين اللي حاملينو يدخلو لبلادهم. بقيتي على خاطرك يا السي بوريطة. شفتي المشاكل ديال بصاح ماشي تلوح كلشي على كتف وزير الصحة. راه الترحيل ودخول لبلاد حكر على وزارة الخارجية.
قودتيها بصاح بهاد الخرجات الانتهازية ديالك