غير تشوف شي قضية فيها أم حمزة عرف تابعها الكلاخ والأمية وقلة الوعي والى سمعتي أبو قتادة هرب حيت تابعها التفركيع والى الشفتي الرفيق كريط الرفيقة كريطة عرف تابعها الإغتصاب والحبس وهاد الحملة ضد جواز اللقاح مجموعين فيها هادو كلهم

غير تشوف شي تجمع فيه أم أيمن أم معاذ أم حمزة عرف راه كاين الكلخ بالروح وغير البلانات الخاوية كيفاش تدير عصير لافوكا بالكرعة كيفاش تصاوب بيت النعاس بالياجور والسيما كيفاش يسبقوك في القرعة دالعمرة كيفاش تمشي عند الراقي الشرعي يغتاصبك وينصب عليك ونتي حالة فمك، أما إلى شفتي أبو حذيفة وأبو قتادة أبو أسامة داك الساعة هرب عرف راه كاين التفركيع والإرهاب وفي أحسن الأحوال خودنجال والتشدد والزرود والياجور والسيما والبناء العشوائي، وإلى شفتي شي تجمع فيه اليساريين ديال العاصمة عرف راهم علفهم مصير وولادهم قاريين في أحسن المدارس وهوما مدورين الصرف وعايشين حياة مرتاحة، وغادي غير يسرحو فيك لعيا نتا أو نتي لي جايين للرباط يقراو على راسهم، والى قابليتهم تقدر تدبر على شيم ونتيف خاوي وتضيع راسك وحياتك، وهوما ولادهم غادي يمشيو يكملو قرايتهم برا ونتا غادي تبقى تدور في القهاوي والبيران تعاود على الأمجاد والمعارك الخالدة مع المخزن الغاشم.
في هاد الإحتجاجات والحملة ضد جواز التلقيح تخلطوا بجوج، غادي تلقى أم أيمن مآمنة بأن كورونا خطة صهيونية للسيطرة على المسلمين، وباللقاح المسلمين غادي يبقاو يولدو غير المعوقين لي ماغاديش يقدرو يحررو القدس مستقبلا لأن المعركة لم تنتهي باقي غادي يرجع الأقصى وينزل المهدي ويعم السلام في العالم حسب إعتقادات أم أيمن، وجنبها غادي تلقى أستاذة جامعية مناضلة طبقة وسطى كتعتاقد بأن المخزن هو أصل الشرور وأي قرار دياتلو خاصو يتواجه ونوقفو ضدو في شارع محمد الخامس في الرباط قبالة مية كاميرة والصحفيين كثر من المحتجين، وغادي يتخلطو معاهم بزاف ديال المغاربة خريين سواء على نيتهم أو ماعارفينش أو عارفين وماباغينش وهادشي عادي وصحي ومزيان، الدولة ماشي مقدسة باش تكون قراراتها كلهم يتثابلو بطاعة عمياء غير مشروطة، وهادشي طرا في العالم كامل مظاهرات ضد اللقاح والفيروس والحجر الصحي وكولشي.
ولكن لي ماشي عادي في المغرب هو أن الناس لي ضد اللقاح وضد جواز التلقيح، كالسين ينشرو في الإشاعات يوميا على مواقع التواصل والحملة ديالهم غادا وكاتكبر في المقابل كاين صمت الأموات من طرف الدولة والإعلام العمومي و وزارة الصحة، لي عوض يجيب وشي واحد يرد بالدارجة وبلغة المغاربة على دوك الإشاعات والتهويل والتضخيم من أضرار اللقاح، كالسين يخرجو بيانات لغة الخشب لي مكيقراها حد أصلا ومعندها حتى شي أثر، الإشاعات كتنتاشر وعندها لي يدافع عليها ويبررها ويعززها، الناس كثار كتهدر على حالات الموت والشلل باللقاح، ومكتسمع غير ولد ختي لقح عواج جدي لقح طار، حدانا عائلة تشللو كلهم، اللقاح ماغاديش يمرض دابا ولكن يقدر يمرض من دابا عشرسنين وعشرين عام هاد الهدرة قالتها منيب في باب البرلمان، فيناهي وزارة الصحة أو الإتصال أو الداخلية أو أي عجب لي يقدر يتواصل مع المغاربة بالدارجة طبعا ويعطي الأرقام الحقيقية ويفند هاد الإداعات، راه صمت وزارة الصحة كيخلي شائعة أن الوزارة تتكتم على الحالالت لي تضررو بسباب اللقاح وهادي هدرة كانت كتقال حتى على أرقام الموت بكورونا مابقى غير أعراض اللقاح.