واحد فايت تلاتين عام ساكن مع واليديه غير مقاتل مع الوقت مرة خدام مرة مريح شبعان بلية وسوء التغذية وكابر بالخبز وأتاي وحتى هو خايف من اللقاح حيت غاي يقتليه الحيونات المنوية، بحال هذا خاصو يكون فرحان الى كان اللقاح كيدير هادشي

راه غادي يفكو من شلا صداع وشلا مآسي يقدر يطيح فيها هو وهاد الولاد المستقبلين لي ناوي يولد ويسميهم رايان وريتاج، يقدر يبان هادشي كليشي ولكن هاد الهدرة سمعتها من بحال هاد النوع عند الحلاق وفي القهوة وفي الحمام، واخا هو راه بلاصة هاد العلم المركز هو الطاكسي كبير تما فين كتسمع هاد العلم مركز الروح ديال الهراء ونظرية المؤامرة من طرف الدولة والمرفحين والحكومة العالمية والنصارة وليهود ونيتفليكس على المزاليط باش يسيطرو عليهم كثر ملي مسيطرة عليهم الحزقة وقلة شي.
ولكن دابا مع فايسبوك وتيك توك هاد العلم كتدخل وتلقاه كيتقياوه ناس أميين وقارين ومخلطين، بنادم منوض المقاتلة على اللقاح ماباغيش يلقح حيت غادي يمرض ويموت أو يولد الدراري مشوهين والدم دياتلو غادي يتوسخ وشلا خزعبلات، علما أن راه عشرين مليون ملقحة في المغرب ومطراش ليها هادشي، أييه غادي تلقى شي حالة أو جوج وقعو ليها مضاعفات ولكن راه الى فرقتي غير جوج دراهم كاو كاو على عشرين مليون غادي تلقى ناس بانو فيهم أعراض جانبية وكاين لي غادي يقتلهم الى ممشاوش للمستعجلات في الوقت المناسب، في الوقت لي العالم غادي وكيقضي على كورونا بسباب هاد اللقاح لي هو إنتصار علمي كبير، وكيبين أن الإنسان في شمال الكرة الأرضية قادر أنه يتغلب على أخطر الفيروسات وقادر أنه ينقذ العالم معاه.
كاين مجموعة في فايسبوك ديال مغاربة ضد التلقيح دايرة بحال شيس بيطار ديال الحماق، بنادم كيفتاخر أنه تخلى على خدمتو باش مايلقحش، أو باغي يخرج فلوسو من البنك حيت مخلاوهش يدخل بلا جواز وباغي يقاطع ومنوض حرب غير بوحدو ضد الدولة، وكون غير مسألة اختيار وفقط، بل كيبقى يعطيو شهادات أغلبها كاذبة طبعا ديال ختي لقحات تشللات، راجل خالتي لقح مابقاش يقيم واخا عندو غير تمانين عام، واياك شي واحد يتبرع ليك بالدم فيه لقاح كرونا، عنداك تزوجوا شي حد ملقح ولادكم غادي يخرجو مشوهين( على أساس كانو غادي يخرجو ولاد سكارسكارد)، هذا راه وباء جماعي والتغلب عليه غادي يكون جماعي أيضا مايمكنش تتخلف فئة من المجتمع بداعي الحرية وجسدي حريتي وداك الهدرة لي هوما أصلا ضدها، بحال وحدة منقبة خارجة في وقفة ضد اللقاح وتقوليك جسدي حريتي ونتي مغنبراه، وأصلا لا يجتمع يساري وإسلامي على خير، وهادشي لي واقع دابا.