مدرب الاسود. دافع علي النصيري وشكر بوفال ولقى مبررات للشاعر: انتاقدوني وزيدو انتاقدوني ولكن كننعس مزيان وكناكل مزيان وبديت ننقص الوزن گاع وللي عشناه اليوم مزيان لينا

دافع وحيد خاليلوڤيتش مدرب الاسود اليوم الثلاثاء فياوندي على اختياراتو. على تشكيلتو. وحيد دافع فندوة صحافية بعد تعادل مع الگابون وسالى فالمقدمة٬ على يوسف النصيري. وقال باللي متيقن باللي غادي يرجع مستواه لكبير. ذكر باللي هاد اللعاب ما لعبش هادي 3 الى 4 اشهر.
بخصوص ادخال الشاعر فهاد الماتش واللي خرجو بعد نص ساعة اقر وحيد بخطئو وقال باللي غامر باش دخلو. المدرب قال علي اللي ينتاقدوه "خاصهم تنتاقدوني ولكن كننعس مزيان وكناكل مزيان وبديت كنقص فالوزن".
وبرر هاد الاختيار قال "سبق جربت هاد التكتيك. جوج مهاجمين وكان مزيان. اليوم ما صدقش. وعاد وقال "استفدت دروس من هاد الماتش ولكن الجانب الايجابي هو رجعنا فيه جوج مرات.
بخصوص دخول بوفال قال المدرب باللي حرك الماتش "قلت ليه سير بروڤوكي الدفاع" وبين اللي راضي عليه وعلى مستواه
وحيد اعتبر ان هاد النتيجة مهمة. "ربحنا 11 ماتش ولقينا ريوسنا اليوم خاسرين. يقدر هاد الشي يعاوننا مستقبلا. اللعابة متافقين معايا"
وحيد قال باللي "دابا بدات منافسة جديدة". دابا بدات ثمن نهاية كأس افريقيا للامم