سكوب..حفظي مستشار البصري سابقا اللي طردو ورئيس جامعة النقل واللوجستيك فالباطرونا زاد فأثمنة الطرونسبور بلا خبار الباطرونا وتحدى مجلس المنافسة

علمت "كود" من مصدر مطلع بأن عبد الإله حفظي، الرئيس السابق لفريق الاتحاد العام لمقاولات المغرب بمجلس المستشارين، ورئيس جامعة النقل واللوجستيك فالباطرونا، دار البارح قرار غبي بلا خبار المسؤولين ديال الباطرونا وذلك بالزيادة فأثمنة النقل ب20 في المائة.
حفضي للي كان فديوان دريس البصري، وزير الداخلية السابق اللي كولشي كيتخلع منو وطردو من الديوان، يمكن جاب هاد السياسة ديال القرارات الانفرادية والفوقية من زمن البصري وبغا يطبقها على النقل بجميع انواعه، مع العلم بأن ميمكنش يطبق نفس الزيادة على كولشي، الطرونسبور ديال الكيران ماشي هو الطاكسي وماشي هو النقل ديال السلعة وو. قرار غير مفهوم وغير قانوني حسب مختصين فالقانون.
حفضي بهاد الزيادة ضرب فمؤسسة مجلس المنافسة للي رئيسها احمد رحو سبقلو هضر مع الباطرونا، وقاليهم "ميمكنش تزيدو كولشي بنفس النسبة خصوصا فالنقل، وكل نوع ديال النقل تقدر تكون فيه زيادة معينة".
"كود" دارت جولة صباح فمحطة القامرة، حتى واحد فالمهنيين مبغاش يدير هاد الزيادة وميقدوش يزيدوها، تصريحات مؤثرة من شوافرية ومن مسافرين، كلشي ضدها، والغريب انه جات من الباطرونا لي كتمثل فقط مصالح بعض الشركات الكبيرة فالنقل خصوصا النقل ديال البضائع لي عندو علاقة بالاستيراد والتصدير.