"كود" فمحطة القامرة: مكاينش زيادات فثمن الطرونسبور بين المدن..ومهنيون ل"كود": صعيب نزيدو فالثمن والقضية مكفسة على كولشي بسبب ارتفاع الاسعار

أثمنة التنقل فالطاكسيات الكبار والكيرانى متزادوش، حسب تصريحات عدد من المهنيين والسائقين والمسافرين، ل"كود".
هادو كاملين من مسافرين والكورتي والشيفور وصحاب وكالات الكيران كلهم قالو ل"كود" بأن أسعار التنقل بين المدن لم ترتفع صباح اليوم، رغم قرار رفع أسعار التنقل ب20 في المائة من طرف الجمعية المغربية للنقل واللوجستيك.
بالنسبة ليهم ميمكنش يقبلو بشي زيادة فهاد الوضع لي كولشي مزير فيه ومقلق ومعصب.
بالنسبة لبعض شركات النقل ديال الكيران فمحطة القامرة بالرباط، كيقولو بلي صعيب ويستحيل يزيدو فالثمن بحيث يالله خرجو من الازمة ديال كوفيد وباقي كيتسناو تنتعش الحركة، وميقدرش يثقلو كاهل المواطن بشي زيادة.
دبا الباطرونا لي فيها جمعية النقل واللوجستيك، بغات تشعلها فالبلاد، الباطرونا بانت اطماعها من جديد ومكيهمش جيب المواطن ولا استقرار البلاد. بهاد القرار كيزيدو يشعلوها ويستغلو صمت الحكومة وضعف التحالف الثلاثي للي اصلا ماشي منسجم.
الباطرون بهاد الزيادة غادي تشعل اسعار الخضر والفواكه واللحوم، لأن هاد الزيادة كتهم بالاساس النقل ديال البضائع