برافو للحكومة وللجامعة. دارها جمهور الحمرا. رباح الوداد لعب فيه الجمهور لكبير دور حاسم

الوداد البيضاوي ماشي فازهى ايامو. خسر جوج ماتشات واحد فالعصبة مع بيترو أتلتيكو الأنغولي السبت اللي فات بجوج لواحد والثاني مع الحسنية فالبطولة بجوج لزيرو. المورال ماشي حتى لهيه. لكن قرار رئيس الحكومة عزيز اخنوش فلقاؤو برئيس الجامعة الملكية فوزي لقجع اللي فنفس الوقت عضو فهاد الحكومة٬ بعودة الجماهير للتيرانات بدل كلشي،
شفنا البارح الراجا ربحات فعصبة الابطال نيت فكازا بدعم من الجمهور. اليوم حضور كثر من 60 الف ودادي خلى اللعابة يضاعفو مجهودهم. حمسهم. طلع ليهم المورال. بانت وداد اخرى ما عندها علاقة بالوداد اللي خسرات مع الحسنية وقبلها مع بيترو أتلتيكو. وداد كتقاتل. وداد كلها حماس ورغبة فالرباح واصرار على التعادل بعدا.
الماتش بدا صعيب للحمرا. مع الدخلة زيزو ديال الزمالك ماركا بيت على الوداد. هنا الفرقة مع دعم الجمهور لكبير غير كلشي. ما ديموراليزاوش. اللا. بقاو فالماتش وماركاو التعادل فالدقيقة 27 عن طريق زهير المترجي 10 دقايق من بعد زاد امين فرحان الثاني. فدوزيام ميتا وقبل نهاية الماتش بجوج دقايق ماركا يحيى جبران الثالث.
رباح كبير وكيطلع المورال بزاف. فيه شوية من رد الدين على اقصاء الاسود فكأس افريقيا للامم امام مصر فربع النهاية. فيه ترجع شوية الدين حقاش كاينين لعابة لعبو ضد الاسود فهاد الماتش خاصة الحارس ابو جبل وزيزو...
اذن هاد القرار ديال عودة الجمهور عاود الاندية المغربية. عاود الوداد. عاون الرجا. اكيد غادي يدعم غدا نهضة بركان