حروب "اللحم كاشير" مستمرة. اشهر گزارة فكازا من اليهود دايرين وقفة قدام الولاية ضد بيرديگو: راه كيربح 12 درهم فالكيلو اللي وصل ل180 درهم وقال لينا اللي ما عجبوش الحال يمشي لاسرائيل

مجموعة من الگزارة حلال" المغاربة صحاب الديانة اليهودية كانو تلاقاو مع والي الدار البيضاء حميدوش البارح واللقاء ما خرج منو والو.
غاديين وفق مصادر من عندهم ل"كود" يديرو وقفة احتجاجية الجمعة الجاية قدام الولايةكانو كانو راسلو الوالي نهار 24 فبراير من الشهر الفايب. هدرو ليه على المشاكل ديالهم.
رسالة وقعها اشهر الگزارة الحلال فكازا عمار مول "ديليس داند" وبيتون مول "امسلم" وكريسبان مول العلامة "كريسبان" ومارسيانو مول العلامة "مارسانو" وبيريز مول العلامة "بيريز". وفق تصريحات هاد المتضرريين٬ فهاد الوقفة غاديين يديروها لان اللقاء مع الوالي البارح ما عطى حتى نتيجة
اش كيطالبو هادو؟
كيطالبو يسمح ليهم رئيس الطائفة اليهودية بالمغرب سيرج بيرديكو بالدبيحة اي يديرو علامة "كاشير" على اللحم. كيقولو كيف جا فالرسالة اللي عند "كود" نسخة منها٬ ان هاد المارشي عطاه بيرديكو لواحد من باريس اسمو يواڤ الصباغ.
هادو كيقولو باللي بيرديكو قال ليهم "اللي بغى الدبيحة يشري من عندي" وباش رفضو قال ليهم وفق مصادر "كود" اللي ما عجبوش الحال يمشي لاسرائيل.
احدهم قال "واش كثر من 40 عام وحنا كندبحو وحياتنا كلها فهاد لبلادوباغيينا نمشيو لاسرائيل"دابا هما كيقولو باللي محتاجين للحم بزاف فالعيد ديالهم بداية ابريل وغادي يبقى الاحتفال 10 ايام واهم وجبة عندهمهو اللحم.
كيقولو باللي اللحم وصل لحد الان ل180 درهم للكيلو. لغلا دايرنو الضرائب وباللي بيرديكو كيطلب فالكيلو الواحد12 درهم كيف جا فالرسالة. هاد الگزارة كيقولو باللي راهم مع تطبيق القانون فهاد البلاد وباللي ضد الدبيحة السرية. دابا الافاق عندهم تسدات وما بقاش عندهم بديل.
هاد الشي ديال الگزارة هي فالاصل حرب كبيرة بين الحاخام بينتو وبيرديگو. هادي مدة وهي نايضة وبزاف. دابا المارشي المغربي ديال "كاشير" ماشي هو علاش نايض الصداع. راه قليل بزاف. نايضة على السياح الاسرائيليين اللي من المفروض يجيو للمغرب. توقعات مشات حتى لمليون سائح. وشوفو شحال غاديين ياكلو ديال اللحم وشكون غادي يترفح فهاد المارشي لمگمح بزاف بزاف