اعتقال ساركوزي شوش على “كرانس مونتانا” وفضايح مارشيات بلا مناقصة ديال مريم ابيكزير وليلى اوعشي خربقو الحدث ومع ذلك كاين الضو فهادو

سالى “كرانس مونتانا” هاد العام. ناس خدمو فالمؤسسات العمومية والادارات والوزارات وسهرو الليالي. ناس ربحو مارشيات بلا مناقصة بلا تمارة. شي كيخلعهم بمعرفتو بناس فالرباط بحال كيف كيدير ليلى اوعشى مولات “او ال للتواصل” واللي ولات ديما كتاخد مارشي “الصحافة” وما كديرش الخدمة كيديروهاش ناس فالمؤسسات العمومية. ماشي غير بوحدها اللي كيتاكل كعكة هاد الحدث ولانو فالداخلة وكيجيوه شخصيات كيخلي واحد العينة ما كتبغيش المحاسبة دير ما بغات. بحال مريم ابيكزير مولات “افان سين”. مارشيات كبار كتاخدهم. شكون كيدافع عليها وعلاش هي. سؤال كيسولوه الشركات لخرا ديال ليفيمانسيال وما عمرهم قدرو يقولو الجواب حقاش عارفينو ومكمدينها فعظامهم.
دابا هاد التخربيق ديال الدراري الصغار بحال ما كيديروش مناقصات بحال ديما كيحطو شي فاشلين فشي حاجة ماشي ديالهم بحال يعطيو لنفس الشركات نفس المارشي. كنعرفو شكون كيخدم كنعرفو شكون كيساهم باش ينحج هاد الحدث. “كود” هدرات مع ناس الداخلة مع المنتخبين. كلهم كيقولو وشفتو علاش ديما عندنا مشاكل فالصحرا حقاش كاينة بحال هاد الممارسات. وكيزيدو “خاص شي ناس يفهمو باللي بلا ولاد التراب ما يمكنش لشي نشاط ينحج فهاد المنطقة بلا دعم شركات صحراوية فيها ناس الصحرا ما يمكنش هاد الملف يتربح مستقبلا. شوفو كاع اللي كيخرج دابا فاوربا فمجلس الامن كيقولو وكيكررو خيرات المنطقة خاصها تساهم فتنمية المنطقة. ما يمكنش يجيبو لينا وحدين من الرباط ويسكنوهم بيناتنا ويعطيوهم الحوت ويعطيهم التنطيم وكيكذبو علي الناس ويقولو راه خيرات المنطقة كيستافدو منها المنطقة. هاد العقلية خاصها تسالي”. يشرح مصدر “كود”. اللي كيضيف “الناس الوحدويين خاصهم يدعمو بزاف حقاش الفكر الانفصالي كيتوغل وللي مأمنين بان المستقبل مع المغرب باش كيشوفو هاد الممارسات كيرجعو اللاور”.
ها علاش بحال هادو لا ليلى لا مريم كيسيئو. داك التخربيق ديال الانشطة اللي كدار بعيدة على الداخلة بكيلومترات فالداخلة اتيتود على الرياضات البحرية راها لخوا الخاوي. راها كدوب فكذوب. المشكلة ديال الصحرا مع ناس التراب. كيفاش يوليو اكبر محامي كيف دار المغرب مؤخرا باش دا معاه فلقاء كولر المبعوث الخاص للامين العام الاممي الى الصحراء٬ رئيسا جهتي الداخلة وادي الذهب والعيون الساقية الحمراء. هاد الشي خاصو يتعمم. فكاع المجالات. خاص خلق جيل جديد من الوحدويين يدافعو على المغرب فالشارع فالمنطقة ووجههم احمر حقاش مستقبل منطقهم في مغرب قوي.
المهم هاد الشي ديال كرانس مونتانا كيبين كيفاش كيشوفو شي ناس فالرباط لهاد المناطق. هاد الشي خاصو يتبدل. عندهم ناس كيديرو خدمة مزيانة بحال والي جهة الداخلة لمين بنعمر. جا فوقت حساس فيه صراع سياسي كبير وفيه احتقان اجتماعي. الداخلة معاه هدات. علاش ما يكونش عندو دور كبير فهاد الشي ديال كرانس مونتانا. هو عارف اش واقع. حقاش دار خدمة مزيانة لحد الان.
طبعا فكرانس مونتانا كاينين مسؤولين فوزارات كيتسخسخو بزاف باش ينجح الحدث فالاخير تجي ليلى ومريم ويديو المارشيات. هاد الشي خاصو يتغير وفاقرب فرصة ممكنة